غرائب محكمة الأسرة.. رقية: سايب بنتي مع الغُرب عشان يحرمني منها
دعوى حضانة رفعتها أم في محكمة الأسرة يحترق قلبها كل يوم على خسارة ابنتها التي كان زوجها السبب فيها الذي لم يرغب في حياته سوى أن يجلب القهر على قلب من صانته وصانت بيته واسمه طوال فترة زواجهم، ولم يترك لها سوى محكمة الأسرة تلجأ لها حتى تحصل على حقها في رؤية ابنتها.
قصص محكمة الأسرة.. أهله مش كويسين معايا
بدأت «رقية» حديثها وقالت: «أنا متجوزة من 9 سنين، كان جواز صالونات ولما جوزي اتقدملي كان بني ادم محترم وابن ناس، أمه واخواته هما اللي كانوا باين عليهم أخلاقهم من ساعة ما أتقدم كانوا بيستخسروا أي حاجة يجبهالي ومش كويسين معايا».
دعاوي محكمة الأسرة.. بتذل على كل جنية
أكملت حديثها قائلة: «بعد الجواز الدنيا كانت تمام، لكن بعد كدة المشاكل كانت كتير جدا، كان كل ما يروح يزور أمه يرجع مش طايقني، كان مبيصرفش عليا غير على القد لو صرف أصلا، كنت بتذل على كل جنية باخده منه، لما خلفت بنتي قلت يمكن ساعتها يبقى كويس وكان كويس فعلا بس رجع أسوء من الأول».
حكايات محكمة الأسرة.. بيخطف بنتي مني
تابعت حديثها قائلة: «كان بياخد بنتي من ورايا عشان يخلي أمه تشوفها، حتى لو أنا مش موافقة، استحملت كتير عشان مخربش بيتي ومعملش مشاكل، بس هو كان مبهدلني، وصل للضرب والإهانة لحد اخر مشكلة حصلت كانت بسبب أهله برضو، ضربني وأخد مني بنتي المشكلة دي كانت من 3 سنين المشكلة دي ومن ساعتها مشفتش بنتي».
قضايا محكمة الأسرة.. دعوى حضانة
أنهت الزوجة حديثها قائلة: «خد البنت وداها عند أمه تقعد عندها في البيت واخته كانت عايشة معاهم، معرفتش أخد منه بنتي لأنه كان مانعني عنها خالص، حماتي اتوفت من شهر وقتها قلت ممكن يرجع بنتي ليا، بس لسه مصمم إنه يخليها معاه وأخته اللي قاعدة بيها، وجيت المحكمة أرفع عليه قضية حضانة عشان أعرف أخدها لأنها المفروض في حضانتي ».