أخبار محكمة الأسرة اليوم
دنيا لقاضي الأسرة: أهلي مش عايزني انا وابني بعد ما سبت جوزي
دعوى نفقة رفعتها «دنيا» في محكمة الأسرة حتى تحصل على حقوقها هي وابنها الذي لم يبلغ من العمر 3 سنوات وأصبحت هي المسؤولة عنه بسبب إهمال والده له ومعاملته القسوة لهم، وعندما هربت الزوجة من جحيم زوجها وجدت نفسها وحيدة في الدنيا دون سند بعد تخلي أقرب الناس عنها مما جعلها تتوجه لمحكمة الأسرة حتى تجد ملجأ لها.
قصص محكمة الأسرة.. جواز صالونات
قالت «كوثر» في بداية حديثها: «أنا متجوزة بقالي 8 سنين خلفت من جوزي ولد واحد بس، كنا متجوزين جواز صالونات الناس هما اللي اقنعوني بيه، وافقت عليه واتجوزنا على طول بعد الخطوبة، وكان في الأول كويس ومفيش مشاكل منه كان راجل زي بقى الرجالة محترم وبيصرف على بيته وعلى ولاده».
دعاوي محكمة الأسرة.. استحملت عشان ابني
أكملت كلامها قائلة: «من أول ما حملت لحد ما خلفت والدنيا اتغيرت معاه خالص، بقى معندوش إحساس بيبهدلني ويشتمني بسبب ومن غير سبب، ومبيصرفش عليا فلوس غير على القد لو طلبت منه غير كده مبشوفش منه أي حاجة، فضلت كتير معاه في بهدلة بس كنت بستحمل عشان خاطر ابني، عيشت معاه حياة صعبة ومفيش حد يتحملها».
حكايات محكمة الأسرة..أهلي مش طايقين ابني
تابعت حديثها قائلة: «جوزي دماغه وحشه جدا وماشي وره كلام امه في الغلط، لحد أخر مشكلة بينا طردني من البيت أنا وابني، من وقتها وأنا قاعدة عند أهلي انا وابني وهما مش طايقني ولا طايقينه، ومش عازين يصرفوا علينا حاجة، نزلت اشتغل عشان أصرف عليه بس هما برضوا مش مستحملينا وطول الوقت عايزين يمشوني أنا وابني من البيت وبيضربوه ويشتموه وأنا مش موجودة، مبقتش عارفة أعمل إيه معاهم».
قضايا محكمة الأسرة.. قضية نفقة
أنهت حديثها قائلة: «لما أهلي موقفوش معايا اضطريت لرفع قضية نفقة عشان أخد حق ابني من ابوه اللي مش بيسأل عليه ولا عاز يصرف عليه جنيه واحد من ساعة ما طردنا، مليش حد في الدنيا أهلي كل اللي هاممهم الفلوس وبس، وهو عايش حياته وبيصرف على نفسه ومحدش واقف معايا انا وابني ومش عايزة غير حقه وبس».
تابع أحدث الأخبار عبر
