أخبار محكمة الأسرة
الورث عميهم.. فريدة لـ القاضي: عماتي سرقوا حقي في أبويا وجدي وطردوني
تواجدت «فريدة» على أعتاب محكمة الأسرة وهي تحمل الحزن والأسى؛ بسبب ما شهدته في حياتها من ظلم وقسوة من أقرب الناس لها في حياتها الذي من المفترض أن يكونوا سندها وضهرها في الدنيا، شهدت «فريدة» وهي في أول عشريناتها ومن المفترض أن تبدأ حياتها خسارة والدها وجدها ولم تفق من صدمتها حتى وجدت عماتها يعاملوها بقسوة وطردوها من حياتهم وسرقوا حقوقها في ميراث أبيها وجدها مستغلين عدم وجود أحد ليدافع عنها.
قصص محكمة الأسرة.. أبويا مات وأنا عندي 20 سنة
بدأت «فريدة» حديثها وقالت: «أنا عندي 23 سنة والدي اتوفى وانا عندي 20 سنة كانت صدمة كبيرة عليا وكنت مش عارفة هكمل حياتي ازاي من غير ابويا، فجأة بقيت أنا واخواتي وأمي لوحدنا في الدنيا من غير ضهر أو سند ولا حد يشيل مسؤوليتنا ويصرف علينا»
دعاوي محكمة الأسرة.. جدي عوضني عن موت والدي
أكملت «فريدة» حديثها: «بعد وفاة والدي كنت شغالة مع جدي أبو والدي اضطريت اني اشتغل عشان أساعد أمي في مصاريفنا، جدي وقف جنبي ومسابنيش لوحدي وبقيت معاه طول الوقت في الشغل والبيت لأنه كان متحكم في كل حاجة وعوضني عن موت أبويا وخلاني مش محتاجة حاجة».
حكايات محكمة الأسرة.. عماتي طردوني وكلوا حقي
تابعت «فريدة» حديثها والدموع في عينيها: «لحد ما جدي اتوفى من قريب، كانت صدمة أكبر عليا حسيت أني بقيت لوحدي في الدنيا ومفيش حد في ضهري، ومن بعد وفاة جدي الدنيا اسودت في وشي، عماتي استغلوا وفاة جدي وكلوا حقي وطردوني من كل حاجة ومش عايزين يدوني أي حاجة من ورث أبويا او ورث جدي».
قضايا محكمة الأسرة.. رافعة قضايا على أهلي
أنهت «فريدة» حديثها قائلة: «عماتي أكلوا حقي وحق أخواتي واستغلوا ان مفيش حد يقف في ضهري زي أبويا وجدي، حاولت معاهم كتير ودي لكنهم مبقوش يردوا عليا حتى، للأسف محدش كتبلي حاجة تضمن حقي عشان كدة اضطريت أرفع قضية إعلام وراثة عشان ورث أبويا اللي واخدينه من بدري، وهرفع إعلام وراثة عشان ورثي من جدي».
تابع أحدث الأخبار عبر
