«جوزي وأمه عقدة حياتي».. إسراء في دعوى نفقة:"اتحايلت عليهم ميبهدلونيش في المحاكم"
كانت خلافات «إسراء» في البداية مع زوجها الذي لم يتق الله فيها فأذاقها كل أنواع العذاب والإهانة أثناء حياتها معه وعاشت وتحملت من أجل تربية صغارها ولكن أهله لم يتركوها تعيش حياتها بل تدخلوا فيها ودمروها لم يكفيهم العذاب الذي سببه ابنهم «لإسراء» بل زادوا عذابها عندما أمرت حماتها زوجها بتطليقها وبسبب خوف الزوج من أمه طلقها وطردها هي وأولادها دون سؤال.
قالت «إسراء»: «اتجوزت من 2012 قعدت متجوزة 10 سنين وجبت عيلين، المشاكل بدأت من بعد ما اتجوزت واول ما خلفت والمسئولية كترت عليه مكنش عايز يصرف على عيل أو يتحمل مسؤولية بيت».
إسراء: جوزي وأمه كانوا عقدة حياتي
تابعت الزوجة: استحملت ضرب وشتيمة وبهدلة كان بيضربني بالقلم يغمى عليا وعلى طول بيقول الفاظ وحشة، فوق كل ده أمه كانت بتكرهني ومش عايزة تشوفني مبسوطة أبدا لحد ما وصل بيها الأمر انها قالتله يا تطلق مراتك يا تاخدها برة البيت وتمشي وهو بيخاف منها راح مطلقني على طول.
بعدما عانته إسراء مع زوجها وعائلته، عندما تم الطلاق كان تركيزها الوحيد على مصلحة صغارها وتربيتهم السليمة لكن حتى هذا الهدف لم يتركها زوجها وأهله لتحققه.
أضافت «إسراء»: «طلقني ودي عشان عارفين إني لو رحت محاكم هاخد حقوقي كلها منهم وهما مش عايزين كدة، وقعد سنة ونص مسألش في عياله ولا مرة من ساعة ما اطلقت وحاولت اتواصل مع اهله انه يدفعلي نفقة انا والعيال لكن حمايا رفض بعد ما اتحايلت عليه وقالي عندك المحاكم مشوني محاكم بعد كدة عشان اتبهدل وانا مش قد المحاكم ولا معايا فلوس المحاميين وعشت على أمل انهم يحنوا عليا انا وولادي لكن مفيش فايدة لحد ما رفعت قضايا نفقة وتمكين وبيحاولوا بكل الطرق إني مكسبش ولا أخد حاجة».
عند سؤالها عن سبب تواجدها في محكمة الأسرة قالت: «أنا هنا عشان ابني الصغير عامل زرع قوقعة وتعبان عنده نسبة تأخر عقلي ومحتاجة فلوس عشان دكاترة التخاطب وبطل يروح عشان معيش فلوس وقلت لحمايا بالله عليك ابني برة اللي بيني وبينكم المفروض يكون همنا واحد اللي هو مصلحة العيال ومفيش فايدة معاهم أكملت كلامها متأثرة وقالت: معنديش حد يقف معايا لا أب ولا أم مش عايزة حاجة غير إني أعيش في الشقة وأربي العيال».
تابع أحدث الأخبار عبر
