أخبار محكمة الأسرة اليوم
" معتبرني راجل البيت".. أميرة لـ محكمة الأسرة: معتمد عليا طول حياته
وصلت «أميرة» لأبواب محكمة الأسرة بعد أن فشلت أن تصلح حياتها مع زوجها، الذي منذ زواجها منه اعتمد عليها اعتماد كلي في تحمل المسؤولية، وبعد صبرها على زوجها لسنين عديدة فاض بها الكيل ورفعت قضايا نفقة في محكمة الأسرة بعد سنين كانت هي المعيلة فيها لزوجها وأسرتها وتعبت من تحمل المسؤولية وحدها.
قصص محكمة الأسرة..اتعرفت على جوزي عن طريق الشغل
قالت «أميرة» في بداية حديثها: «أنا متجوزة من 2010 معايا من جوزي ولدين، وسايباه من 2022 واتطلقت منه بقضية خلع، اتجوزنا بعد ما اتعرفنا على بعض في الشغل، عرفته وكان شخص كويس ومناسب واتقدملي ووافقت عليه ومكنش يبان عليه أي حاجة وحشة».
دعاوي محكمة الأسرة..رامي عليا المسؤولية
أكملت «أميرة» حديثها وقالت: «مشكلتي معاه إنه مبيصرفش خالص من أول ما اتجوزنا، كان معتمد إن احنا الاتنين بنشتغل وكان رامي عليا كل المسؤولية من ساعة ما اتجوزنا، وأنا كنت شايلة مصاريف البيت والعيال ووافقت وسكت عشان البيت ميتخربش ومعملش مشاكل، وكنت بحاول أخد منه على قد ما أقدر عشان أكفي مصاريف البيت والولاد والدنيا كانت ماشية».
حكايات محكمة الأسرة..قعد سنتين في البيت وشيلته
تابعت «أميرة» حديثها قائلة: «هو كان شغال في السياحة وبعد الكورونا قعد في البيت لأنه مكنش فيه شغل، كنا قاعدين في ايجار ولما ساب الشغل نقلنا وقعدنا في شقة كانت بتاعتي لأننا مكنش قادرين ندفع الإيجار، مكنش بيتصرف ويجيب فلوس واعتمد على الفلوس اللي أنا محوشاها، مع إنه برضوا كان معاه فلوس وبيحوش لأنه كان بيقبض باليورو ومش بيدينا حاجة، قعد سنتين الكورونا مبيصرفش ولما السياحة رجعت رجع يشتغل تاني وقتها أنا منزلتش اشتغل وقلت هيشيل المسؤولية لكن لما اشتغل بقى يديني 500 جنية في الشهر ليا وللولاد».
قضايا محكمة الأسرة.. مش عارفة أخد منه حقوقي
أنهت «أميرة» حديثها قائلة: «حاولت معاه كتير انه يزودهم لأنهم مش كفاية وميعملوش حاجة لكن هو كان بيرفض أخر ما تعبت منه طلبت الطلاق وساعتها ساب البيت ومشي راح عند أمه، دلوقتي رفعت عليه قضايا خلع وأجر مسكن وأجر حضانة وزيادة نفقة وفرش وغطا، أنا مش عارفة أخد منه أي حاجة من حقوقي».