أخبار محكمة الأسرة
سلمى لـ محكمة الأسرة : عشان الشقة أخويا متفق مع جوزي يزهقني
كانت سلمى في محكمة الأسرة ليس فقط بسبب زوجها الذي عاشت معه حياة يملأها العذاب والألم بل أيضا بسبب أهلها الذي لم يقفوا بجانب اختهم عندما كانت في اشد احتياج لهم وتركوها تواجه زوجها الظالم قاسي القلب عليها وعلى أولادها كل ذلك من أجل مصلحتهم فقط.
قصص محكمة الأسرة..مكنش يبان عليه حاجة وحشة
قالت «سلمى» في بداية حديثها: «أنا اتجوزت من 2015 وخلفت من جوزي ولد وبنت، جوزي كان جارنا وكنا نعرفه هو وأهله من بعيد بس، لما اتقدملي كان يبان عليه انه كويس ومكنش يبان عليه حاجة وحشة عشان كدة وافقت عليه على طول».
دعاوي محكمة الأسرة..بيصرف عليا بس مبهدلني معاه
أكملت «سلمى» حديثها وقالت: «بعد الجواز كل حاجة اتغيرت، كان بني ادم صعب عصبي حدا وغلاط ، الأول كان بيخانق ويزعق بس بعد كدة بقى ضرب وبهدلة وإهانة كل شوية بسبب ومن غير سبب، كان بيصرف علينا بس قصاد كدة بهدلني معاه كتير مكنتش عارفة هو بيعمل معايا كدة ليه».
حكايات محكمة الأسرة..اهلي بيتفقوا مع جوزي عليا
تابعت «سلمى» حديثها قائلة: «كنت بغضب كتير واروح عند أهلي وكنت عايزة اسيبه ومرجعش للبهدلة اللي عايشة معاه فيها، بس أهلي كانوا بيرجعوني غصب عني كانوا بيقولوا جوزك ولازم تتحمليه بس انا كنت تعبت منه وجبت أخري، مرة سيبت للبيت اكتشفت ان اخويا بيكلم جوزي بيقولوا هنرجعهالك احنا محدش عايزها».
قضايا محكمة الأسرة.. اخويا بيتفق مع جوزي عليا
أنهت «سلمى» حديثها قائلة: «لحد اخر مرة سيبت البيت كان بسبب انه ضربني كسرلي ايدي ساعتها مبقتش قادرة ارجعله، بس من ساعتها واخواتي مبهدلني، احنا 4 بنات وولد الشقة اللي احنا فيها باسم اخويا بس بفلوس ابويا، وأبويا عايز يخرجني من الشقة عشان أخويا قالبين عليا البيت وعايزين يمشوني وأخر مشكلة حصلت أخويا قالي هجبلك قضية طرد، وهو وجوزي متفقين مع بعض إن أخويا يزهقني عشان أرجعله تاني، بس انا مقدرش ارجعله وجيت ارفع قضية نفقة علشان حقي انا وولادي والاقي مصاريف».
