أم مروة للقاضي: حماة بنتي عايزة تشغلها شغل بطال وابنها موافقها
تواجدت «أم مروة» مع ابنتها التي لم تلحق أن تفرح بها في بيتها فتزوجت لمدة بسيطة قبل أن تعود لحضنها مكسورة وحزينة بسبب ما رأته من زوجها وحماتها.
تزوجت «مروة» على أمل أن يكون لها زوج وأسرة وحياة، لكن من أول يوم زواج لها اكتشفت أن زوجها لم يرغب أبدأ الزواج منها، وأمه هي المسيطرة على كل تصرفاته فكانت تهينها أمام زوجها ولم يرد او يدافع عنها، وفي النهاية طلبت منها أن تعمل عمل حرام لتصرف على ابنها، وقتها هربت الزوجة وتوجهت لمحكمة الأسرة حتى تجد بداية جديدة لحياتها.
ملحقتش أفرح ببنتي
قالت أم مروة: «بنتي اتجوزت من 4 سنين لكنها سايبة جوزها من 3 سنين، مكملتش في بيتها كام شهر ورجعتلي تاني، بسبب اللي شافته من جوزها وأمه، لما اتقدملها هو وأهله كان شكلهم ناس طيبة ومحترمة مكنش يبان عليهم أي حاجة وحشة.»
حماتها وجوزها بهدلوها
تابعت أم مروة: «جوزها كانت معاملته هو وامه وحشة مع بنتي من أول الجواز، كان مش كويس ومبيقدرش يتحمل مسؤولية، كان مبيشتغلش ونايم في البيت وأمه هي اللي كلمتها ماشية في كل حاجة، هو ملوش أي كلمة، أمه كانت مبهدلة بنتي، وأخرتها كانت عايزاها تشتغل شغلانة مش كويسة وتصرف على ابنها، وسمع اللي اتقال و ملوش لزمة»
جوزي مكنش عايز يتجوزني
عند سؤال مروة عن قصتها وسبب تواجدها في محكمة الأسرة كان اول ما قالته عن زوجها «ربنا يسهله، أنا مشفتش منه حاجة كويسة» تابعت والدموع في عينيها: «أنا داخلة حياة جديدة ومش عايزة افتكره، وربنا يعوضني على اللي عيشته معاه، أنا مكنتش بكرهه ولا في نيتي حاجة وحشة نحيته، لكنه مكنش عايزني من الأول ولا عايز يتجوزني هو اللي كان بيقولي انه مش عايزني و بيقولي لو أمك عايزاكي هتقعدك مش عايزاكي هترميكي »
دعوى خلع
أنهت مروة كلامها قائلة: «كان نفسي أعيش وأكمل معاه لكنه ملوش رأي قصاد أمه، وسيبته بسبب اللي شفته منهم، وقاعدة عند أمي من ساعة ما سيبته، ورفعت عليه قضية خلع لأنه رافض الطلاق ودي أو يديني أي حاجة من حاجتي بس انا خلاص مش عايزة حاجة.»