أم هبة للقاضي: جوز بنتي ضربها عشان بتطلب مايه وعايزة أكل لابنها
مثل عديد من الامهات في محكمة الأسرة تواجدت أم هبة مع ابنتها التي كان من الصعب عليها أن ترها في هذه الحالة في هذا المكان، لكنها تعلم أن هذا هو الحل المناسب لابنتها وهو الحل الواجب فعله.
حلمت «ام هبة» أن ترى ابنتها عروسة وترى أحفادها، وعندما زوجت ابنتها و سلمتها لعريسها لم يخطر على بالها انها ممكن ان تتواجد في النهاية في محكمة الأسرة حتى تطلق ابنتها من زوجها الذي لم يرعاها او يكون سند لها ورات معه هي وحفيدها أيام صعبة ملأها الألم والقهر.
جوز بنتي مش مريحها
قالت «ام هبة»: بنتي بقالها ٤ سنين متجوزة، معاها عيل ٣ سنين، من ساعة ما اتجوزت وهي شايفة الهم مع جوزها، المشاكل معاه كانت كتير مبيصرفش عليها ومخليها على طول محتاجة ولما تكلمه يقول معيش، وانا كنت بساعدها على قد ما اقدر عشان بيتها ميتخربش.
معيشها في بيت مفيهوش مايه
تابعت «ام هبة»: اكبر مشكلة كانت بسبب ان البيت اللي هو معيشها فيه مفيهوش مايه، فضلت ٤ سنين عايشة في عماره الناس كلها بيجيلها ماية الا هي، الناس كلها ركبت مواتير واتصرفت وهو مش عايز يركب، الموضوع ده كان تاعبها في حياتها ومش عارفة تعمل معاه ايه، وهو مكمش بيهمه.
مش بيجيب أكل ولا شرب ويقول ده اللي عندي
أكملت الأم: فضلت معاه على الحال ده سنين مشاكل بسبب مشكلة الماية والمصاريف، لحد ما وصل انه بقى يمد ايده عليها لما تطلب منه حاجة وفي اخر مشكلة ضربها بالشبشب على دماغها مقدرتش تستحمل الاهانة وسابته، بعدما زهقها في حياتها وعيشها من غير اكل او شرب ويقول دي عيشتي ان كان عجبك زهقت منه ولقت ان مفيش حتى اكل وابنها كان هيموت منها قالت اطلق.
مخدتش من جوزها ابيض ولا اسود
أنهت «ام هبة» كلامها وقالت: بعد ما اتطلقت مخدتش منه أبيض ولا أسود، ودلوقتي رفعت قضية تمكين عشان ابنها، وقضية نفقة لانه مبيصرفش ولا بيسأل عليهم، وبدعيلها انها تقدر تاخد حقها عشان خاطر ابنها.
تابع أحدث الأخبار عبر
