«أمها ماتت وهي لسه عروسة».. نجوى للقاضي: جوز بنتي عايز يحرمني من حفيدتي
ربت «نجوى» ابنتها وأوصلتها لبيت عريسها وكانت فرحتها عارمة لأنها مثل أي أم كانت تحلم بأن ترى ابنتها عروسة، ولكن واجهت «نجوى» اختبار صعب بعد وفاه ابنتها بعد مدة صغيرة من زواجها.
بعد خسارة «نجوى» لابنتها كانت صدمتها كبيرة وقلبها كان محروق عليها وكان عزاء «نجوى» الوحيد هو أن لديها حفيدتها التي أنجبتها ابنتها قبل وفاتها وأوصتها أن تربيها وترعاها، ولكن لمدة سنة منع زوج ابنتها الجدة من ان ترى حفيدتها، وعاشت «نجوى» مرار الفراق مرة أخرى، ولكنها الأن في محكمة الأسرة وهي تحاول بكل الطرق أن تحقق لابنتها أمنيتها الأخيرة في أن تكون الحفيدة مع جدتها.
اقرأ أيضا
بنتي ماتت وهي لسه عروسة
قالت «نجوى»: بنتي توفت بـ كرونا بعد 10 شهور جواز، توفت وبنتها كان عندها 12 يوم بس، قلبي اتحرق على بنتي وكنت هموت لما عرفت بخبر وفاتها، بنتي وهي تعبانة وصتني إني أخد بنتها وأربيها وأخلي بالها منها دي كانت وصيتها قبل ما تموت وأنا نفسي أحققها.
حرمني من حفيدتي ومكنش بيخليني اشوفها
تابعت «نجوى»: بعد ما بنتي اتوفت جوز بنتي خد حفيدتي ومكنش بيخليني اشوفها لمدة سنة و4 شهور، كنت هتجنن عليها وهو مش راضي يخليني أشوفها، مهما طلبت منه، وفي الأخر اضطريت أرفع قضية حضانة وخدت منه البنت بحكم محكمة لأني ليا الحضانة أنا أم الأم والبنت بقالها سنة دلوقتي عايشة معايا وخدت البنت اربيها.
جوز بنتي عايز ياخد حفيدتي مني
أضافت «نجوى»: بعد ما خدت البنت مكنتش بمنعه عن الرؤية زي ما كان بيعمل معايا وبكلمه وأقوله يجي يشوف بنته انما هو بيرفض ورفع عليا دعوى رؤية، هو من بعد وفاة بنتي طمع في الحاجة اللي كنت جايباها لبنتي وانا كنت جايبالها كل حاجة دي كانت بنتي الوحيدة، لما كلمته وقلتله الحجات تبقى باسم حفيدتي رفض وقالي حاجتي في بيتي ومش هسيب حاجة.
عايز ياخد البنت عشان رفعت عليه دعوة نفقة
أنهت «نجوى» كلامها والدموع في عينيها وقالت: سيبت الشغل عشان اخد بالي من حفيدتي وفي الآخر بيقول في المحكمة إني مش قادرة اخد بالي منها وتعبانة مقدرش عليها، وعمل كل ده لما رفعت قضية نفقة لأنه مبيصرفش عليها، وعايز ياخد البنت وهي لما كانت معاه أصلا امه اللي كانت بتاخد بالها منها وهو مكنش بيقدر ياخد باله منها بسبب شغله، أنا مش عايزة منه حاجة أنا بس عايزة أنفذ وصية بنتي.
تابع أحدث الأخبار عبر
