«عواطلي ومفلس».. أماني في دعوى خلع ونفقة: سبب رميتي أنا والعيال في الشارع
منذ زواج «أماني» اكتشفت أن زوجها غير قادر على تحمل مسؤولية بيت أو أسرة، وفشلت كل محاولاتها في إصلاح حاله وجعله رجل يعتمد عليه.
أماني في دعوى خلع ونفقة: سبب رميتي أنا والعيال في الشارع
تزوجت «أماني» من سنين وكان زوجها لا يصرف عليها أو على أبنائها، كان يعمل يوم ولا يعمل أمامه لشهور، ولسنين وعد الزوج زوجته أن يتغير وينصلح حاله ويعمل ليكفي بيته ولكنه لم يتغير طوال هذه السنين وكان السبب ان الزوجة وأبنائها أصبحوا بلا منزل يأويهم بسبب تراكم الديون عليه وعدم مقدرته على تسديد إيجار شقته، وتواجدت في محكمة الأسرة حتى تحصل على حريتها وحقوقها منه.
كان كويس أول كام شهر
قالت أماني «أنا متجوزة من 2019 فضلت بس 3 سنين مع جوزي خلفت منه عيلين، رافعة عليه القضايا من شهر 4 اللي فات، مشكلتي معاه إنه مبيصرفش على أنا أو عياله، في أول كام شهر كنا كويسين وبعد كدة بقي مبيشتغلش ولا بيصرف»
الديون كترت علينا
تابعت أماني «كان بيشتغل يوم ويريح في البيت قصاده شهر، بيسيب الشغل وميقليش ولما أعرف يقولي طردوني من الشغل أعمل إيه، الديون كترت علينا ومبيقناش عارفين ندفع ايجار الشقة اللي قاعدين فيها ولا فواتير مايه ولا كهربا ولا غاز، أنا مبشتغلش أهلي وأهله كانوا بيساعدونا باللي يقدروا عليه».
اتطردنا من البيت بسببه
أضافت أماني: «لحد ما اتطردنا من البيت بسبب أننا مش عارفين ندفع الإيجار المتراكم علينا وكان هو سبب رميتي أنا والعيال في الشارع، من ساعتها قالي هيتصرف ويجيب شقة تانية نعيش فيها بس مجبش حاجة، وبقالي سنة ونص أنا والعيال قعدين عند أمي وهو قاعد عند أمه ومسألش فينا.»
دعوى خلع ونفقة
أكملت أماني: «طلبت الطلاق منه كذا مرة لأن مبقتش قادرة أتحمله، مرضيش بيقولي هنرجع لبعض ونسد اللي علينا لكنه مبيتغيرش ولا بيعمل حاجة، كان بيقولي نفس الكلام واحنا مع بعض قالي هبقى كويس واسد الديون اللي علينا لكنه متغيرش ولا اشتغل و مسدش حاجة، ورفعت عليه قضية خلع ونفقة أهلي اللي بيصرفوا عليا دلوقتي عايشة مع والدتي على معاش والدي»