غادة بدعوى خلع: طلع تاجر مخدرات «ومش عاوزه أكل عيالي حرام»
تزوجت «غادة» من ابن عمها وتوسمت فيه أن يكون خير الزوج لها وخير الأب لأولادها وكانت لا تتوقع أن يكون هو سبب تواجدها في محكمة الأسرة بعد سنين العشرة التي عاشتها معه.
غادة بدعوى خلع
كانت الحياة التي عاشتها «غادة» مع زوجها مليئة بالصدمات، فعندما تزوجت من ابن عمها ظنت انه رجل تستطيع ان تكمل حياتها وتبني مستقبلها معه، وعاشت الزوجة حياة طبيعية مع زوجها لمده 3 سنوات فقط، من وقتها تغير الزوج وظهرت طباعه السيئة التي دمرت حياة «غادة» وأولادها، حتى اكتشفت في النهاية ان زوجها الذي ظنت انه سيكون سندها تاجر للمخدرات ودخل السجن بسبب افعاله، قررت الزوجة وقتها ان تتركه لأن الحياة معه أصبحت مستحيلة.
زواج أقارب
قالت غادة: «أنا اتجوزت ابن عمي من 18 سنة وخلفت منه 5 أولاد، وسايباه من خمس سنين، قبل الجواز كان كويس ومفيش أي مشاكل معاه كنا قرايب ومتربين سوا، ولما اتجوزنا برضوا كان كويس في أول 3 سنين بس وبعد كدة حاله اتشقلب ولحد دلوقتي مش عارفة ايه اللي خلاه يتغير كدة.»
جوزي راجل صعب
تابعت غادة: «كان شخص سلوكه وحش وراجل صعب تتعامل معاه، على طول خناقات ومشاكل معايا ومع الناس اللي حوالينا، وكان على الحال ده لسنين وحاولت كتير معاه إنه يتعدل ويبقى كويس عشان بيته وأولاده لكن مفيش فايدة معاه كان على طول مبهدلني معاه»
مبيصرفش بقاله 10 سنين
أكملت غادة: «10 سنين مبيصرفش على البيت ولا على العيال أنا اللي شايلة المسؤولية البيت وبشتغل وأصرف من وانا معاه، وهو مش شايل مسؤولية حاجة، وكل لما اشتكي ولا أقوله ياخد باله من البيت والعيال ملاقيش منه غير البهدلة والإهانة»
دعوى خلع بسبب المخدرت
أضافت غادة: «لحد اخرتها اكتشفت أنه بيتاجر في المخدرات بقاله سنين وانا معرفش، وعرفت لما اتحبس بسبب المخدرات، مكنتش أعرف قبل ما يتحبس حاجة زي كدة، لما عرفت سيبته على طول ورفعت عليه قضية خلع لأني مقدرش أكمل معاه بعد كدة وهو رافض يطلقني، مبيسألش على عياله و أخر حاجة عرفتها عنه أنه اتحبس تاني بسبب مشاكل عاملها مع ناس غريبة.»
