«مشغلني خدامة لأهله».. قسمت في دعوى نفقة: بنضف وأطبخ لعيلته وفي الآخر مفيش شكرا
منذ زواج «قسمت» كانت حياتها الزوجية أهل زوجها جزء كبير منها ووافقت الزوجة على هذه الحياة مع زوجها وكانت تتقي الله في بيتها وأسرتها لكن عندما وجدت عدم التقدير من زوجها وأهله توجهت لمحكمة الأسرة حتى تضع نهاية لحياتها معه.
قسمت في دعوى نفقة: بنضف وأطبخ لعيلته وفي الآخر مفيش شكرًا
"عايشة خدامة لأهله" هذا ما بدأت به «قسمت» كلامها عن زوجها الذي كانت حياتها معه لها شكل مختلف غير أي زوجين، فمنذ أول يوم زواج اشترط الزوج على زوجته أن تخدم عائلته وتساعدهم في عمل البيت وبالرغم من رفض الزوجة في البداية وافقت حتى لا يحدث مشكلة ولكن انتهت بها السبل في محكمة الأسرة بعدما وجدت أن حياتها أصبحت مليئة بالألم وعدم التقدير.
جواز في بيت العائلة
قالت «قسمت»: أنا اتجوزت من 2011 وخلفت من جوزي وكنت متجوزة في بيت عائلة، أنا وجوزي مكناش قرايب ومن ساعة ما اتقدملي وأنا عارفة اننا هنعيش في بيت أهله بتاع العيلة وكنت موافقة وقلت هعامل أهله زي أهلي ومش هيبقى في مشاكل.
عايشة خدامة لأهله
تابعت «قسمت»: من بعد الجواز جوزي طلب مني أنزل واخدم عند أمه في البيت كنت رافضة في الأول وبعد كدة قلت امشي الدنيا واتحمل ومعملش مشاكل وأخرب بيتي، وكنت فعلا بنضف وأطبخ وأخدم في بيت أهله وبيتي شايلة كل ده لوحدي.
صحتي راحت بسبب الخدمة
أكملت «قسمت»: مبسمعش كلمة شكرا ولا من جوزي ولا من أهله محسسني انه الخدمة فرض عليا، لحد ما تعبت من خدمتهم صحتي مبقتش تتحمل، مبقتش قادرة اني احافظ على بيتي ولا قادرة أخد بالي من ولادي، ولما طلبت من جوزي إني أبطل أخدم عمل معايا مشكلة كبيرة وقالي مينفعش لازم تخدمي أهلي.
دعوى نفقة
أنهت «قسمت» كلامها: أخر ما تعبت قررت اسيب البيت، لما حاولت اتفاهم مع جوزي كتير لكنه رفض وعمل معايا مشاكل وأهله عملوا معايا مشاكل لما عرفوا اني مبقتش قادرة أخدمهم، ومن ساعة ما سيبت البيت جوزي مسألش فيا ولا في عيالي، رفعت قضية نفقة عشان خاطر ولادي اللي مبيسألش فيهم دول وأنا مش معايا أصرف عليهم.
تابع أحدث الأخبار عبر
