«خلعته بعد 23 سنة».. نهى في دعوى تمكين: رماني أنا والعيال في الشارع
عندما تقدم عريس «نهى» ليتزوجها ظنت أنها ستدخل عش الزوجية وتنشئ أسرة معه ولم يخطر في بالها أبدا أنه سيدفعها بتصرفاته بعد 23سنة في النهاية لتصل لأبواب محكمة الأسرة.
"23 سنة جواز وفي الأخر بيطردني في الشارع" هذا ما قالته «نهى» وهي منهارة أمام محمة الأسرة والحسرة تملئ قلبها على السنين التي ضيعتها مع زوجها الذي لم يقدرها أو يعمل حساب لعشره السنين بينهم أو لأولادهم والحياة التي بنوها سويا، وأجبرها بتصرفاته وقسوته عليها أن ترفع دعوى خلع حتى تنهي العذاب الذي تعيشه معه.
اقرأ أيضا
سيبت جوزي بعد 23 سنة بسبب عمايله
قالت «نهى»: “اتجوزت من 23 سنة جواز صالونات وخلفت 5 عيال، وكل واحد فيهم دلوقتي بقى كبير وده السبب اللي خلاني مخافش أسيب جوزي بعد السنين دي كلها أن ولادي مبقوش صغيرين ومش هيتبهدلوا لو انفصلت أنا وأبوهم”.
جاتله حالة نفسية ومش عايز يشتغل
تابعت الزوجة: في المشاكل مع جوزي بقالي سبع تمن سنين، مش عايز يصرف على البيت خالص، لما حصله مشكلة صحية وعمل عملية قلب مفتوح، كان عنده محل وقفل، وقتها جاله حالة نفسية بقى قاعد في البيت ومش عايز يشتغل ولا يصرف علي أنا وولاده، قبل السبع سنين كان كويس ومكنش في مشاكل بينا غير المشاكل بين أي زوجين.
اقرأ أيضا
بيضربني قدام ولادي بسبب ومن غير سبب
أضافت «نهى»: اتفهمت إنه تعبان وممكن مبقاش قادر يشتغل لكن كنت هعيش إزاي أنا وولادي من غير حد بيتشتغل ويصرف علينا، اضطريت وقتها إني أنا اللي انزل واشتغل وأصرف على عيالي، مكنش عندي مشكلة أعيش معاه على الحال ده وأساعده، لكن الحياة معاه كلها كانت إهانة وبهدلة، بقى بيضربني كذا مرة قدام ولادي الكبار بسبب ومن غير سبب.
جوزي كل شوية يطردني أنا وولادي من البيت
أنهت الزوجة كلامها وقالت: المشاكل معاه طول الوقت كانت بتزيد، كان كل شوية يطردني أنا وعيالي من الشقة مع كل خناقة بتحصل، لحد ما تعبت منه ومرجعتش تاني أخر مرة طردني فيها، اتطلقت منه بقضية خلع لأنه رفض يطلقني ودي عشان ميدفعش فلوس، فجيت أرفع دعوى تمكين، عشان أخد الشقة وألاقي مكان أعيش فيه أنا وولادي أنا خلاص مش عايزه منه حاجة كفاية سنين عمري اللي ضيعتها معاه.