أخبار محكمة الأسرة اليوم
«ضيعت عمري مع خاين».. ميادة في محكمة الأسرة: بيكلم الستات قدامي ومش بيتكسف
زواج دام 23 عاما كانت نهايته محكمة الأسرة ودعوى خلع وفقة رفعتها الزوجة بعد محاولتها العديدة طوال زواجها أن تصلح من حال زوجها الذي كانت الخيانة في طبعه، من أجل بيتها وأسرتها وحتى لا تخسر حلمها في أن تعيش حياة مستقرة، وبعد أن فاض الكيل بها قررت أن تتركه حتى تستطيع عيش حياتها دون غدر وخيانة وقهر، وكانت محكمة الأسرة آخر محطة وصلت لها.
قصص محكمة الأسرة.. تعبني معاه من يوم ما اتجوزته
قالت «ميادة» في بداية حديثها: «أنا متجوزة من 23 سنة، أنا وجوزي كنا قرايب من بعيد ما كناش نعرف بعض قبل الجواز، أهلي اللي جابوه وهما اللي وافقوا عليه، وأنا ما كانش ليا رأي، ما كنتش عايزة أتجوز أصلا، تعبني معاه من يوم ما اتجوزته، وعمره ما ريحني أبدا ، لا فلوس ولا معاملة كويسة ولا أي حاجة. استحملته بس طول السنين دي عشان خاطر عيالي التلاتة اللي خلفتهم منه».
دعاوى محكمة الأسرة.. بتاع ستات من يوم ما اتجوزته
أكملت كلامها قائلة: «من ساعة ما اتجوزته وهو راجل بصباص وبتاع ستات، وأنا كنت عارفة من زمان، كان بيكلمهم قدامي في التليفون ويقعد يهزر معاهم، وما كنتش أقدر أقول له حاجة لا يزعل ويعمل مشكلة، فضلنا على الحال ده سنين، اشتكيت لأهلي ولأهله، واتكلمت معاه واتخانقنا وسبت البيت كتير، كل مرة يوعدني إنه هيتعدل، لكن ما فيش فايدة معاه أبدا، كل مرة أرجع يبقى أسوأ من الأول».
حكايات محكمة الأسرة..موقفش معايا في تعبي
تابعت حديثها قائلة: «صبرت عليه كتير وهو استقوى عليا وما رحمنيش أبدا، لحد من قريب تعبت وقتها ما وقفش جنبي خالص وسابني لوحدي، حتى العلاج ما كانش بيجيبه ليا لما باحتاجه، من وأنا تعبانة سبت البيت ورحت عند أهلي ياخدوا بالهم مني، وبعد ما خفيت حاول يرجعني تاني البيت، اتصالحت ورحعت بعد كده لقيته بيكلم ستات قدامي تاني، وقتها قررت أسيبه لما لقيت نفسي زهقت من حياتي معاه، سبته وجاية أرفع عليه قضية خلع ونفقة عشان أخلص منه ومن الحياة معاه بعدما ضيعت عمري مع واحد خاين».
تابع أحدث الأخبار عبر
