أخبار محكمة الأسرة اليوم
محكمة الأسرة.. أميمة: حظي وحش في الدنيا مبيكمليش جوازة
دعوى خلع ونفقة رفعتها سيدة على زوجها الثاني في محكمة الأسرة بسبب إدمانه للمخدرات، كانت زيجة «أميمة» الثانية هدفها أن يكون لها ضهر وسند بعد وفاة زوجها الأول ولكن تدمرت حياتها وخسرت حلمها.
قصص محكمة الأسرة.. مكملتش سنتين وجوزي مات
بدأت «أميمة» حديثها وقالت عن زيجتها الأولى: «أنا اتجوزت أول مرة من 11 سنة كان عندي وقتها 19 سنة واتجوزت وخلفت ولد ومكملتش معاه سنتين ونص واتوفى تعب فترة قليلة بس وبعد كدة مات فجأة وبقيت لوحدي أنا وابني في الدنيا».
دعاوي محكمة الأسرة.. خلع ونفقة
أكملت «أميمة» حديثها وقالت: «بعد وفاة جوزي الأول كنت لسه صغيرة اتقدملي واحد وساعتها وافقت عليه وقلت عشان يبقى ليا ضهر في الدنيا وهو كان كويس معايا ومع ابني، اتجوزته وخلفت منه ولدين، التاني اتجوزته من 7 سنين وهو اللي ماشية في إجراءات قضية الخلع والنفقة بقالي دلوقتي سنة وشوية».
حكايات محكمة الأسرة.. جوزي مدمن كريستال
تابعت الزوجة حديثها قائلة: «مشكلتي معاه كانت إنه بقى بيشرب مخدرات، مكنش بيشرب في أول الجواز لكن بعد كدة طلع مخدر الكريستال ده عرفه من صحابه وبقى مدمن عرفت لأنه كان بيشرب قدام عيني أنا والولاد، حاولت اساعده إنه يبطل عشان بيته وولادة لكن رجع تاني بعد ما خرج من المصحة».
قضايا محكمة الأسرة..كان هيطلعني بفضيحة
أنهت «أميمة» حديثها قائلة: «المخدرات كانت مضيعة دماغه كان بيضربني ويعذبني وهو شارب وهو فايق وأنا كنت مستحملاه عشان خاطر ولادي ميتبهدلوش، اللي خلاني اسيبه الشك كان بيشك في كل اللي حواليه بسبب المخدرات، بيشك فيا على كل حاجة بيقول إني بخونه وبسرقه وبكدب عليه واتهامات كتير لما لاقيت الوضع كدة قررت مكملش معاه لأنه كدة هيطلعني بمصيبة أو بفضيحة والعيار اللي مبيصبش يدوش أنا راعيت ربنا فيه وهو مصانش بيته ولا أولاده».
تابع أحدث الأخبار عبر
