أخبار محكمة الأسرة اليوم
وداد لـ محكمة الأسرة : عايش معايا ورافع عليا قضايا وعاملي محاضر ضرب
رفعت «وداد» دعوى خلع في محكمة الأسرة بعد حياة زوجية عاشتها ملأها الخيانة من زوجها، وعندما ظنت الزوجة أن إذا حملت طفله سيتغير حاله وتتحسن أخلاقه حدث عكس ما توقعت، وبالرغم من كل ما مرت به حاولت بكل الطرق أن تحافظ على أسرتها لينتهي بها الأمر في محكمة الأسرة.
قصص محكمة الأسرة..مبانش عليه أي حاجة وحشة قبل الجواز
قالت «وداد» في بداية حديثها: «أنا متجوزة من 4 سنين، أنا وجوزي كنا قرايب من بعيد بس أنا وهو كنا نعرف بعض قبل الجواز وكنت بحبه وهو بيحبني، قبل الجواز كان كويس جدا ومحترم ومفيش منه مشاكل وكنت فاكرة إني عارفاه وعارفه أخلاقه كويس لكني كنت غلطانة، في الأول مكنش يبان عليه أي حاجة وحشة لكن بعدين كل ده اتغير».
دعاوي محكمة الأسرة..خلفت منه عشان يبطل يخوني
أكملت «وداد» حديثها وقالت: «بعد سنة ونص جواز اكتشفت إن جوزي بيخوني، عرفت من تليفونه لقيته بيكلم ستات كتير طول الوقت، الأول حاولت أتكلم معاه واعقله لكن مفيش فايدة، خليت الأهالي يتدخلوا برضو مفيش فايدة معاه، وكله قالي أصبري عليه وبكرة هيتعدل ويبقى أحسن والمسؤولية هتخليه مش فايق لحد غيرك، سمعت كلام أهلي وحملت منه في بنتي، وقلت يمكن يبطل يكلم ستات لو عرف».
حكايات محكمة الأسرة..فرحت إني هرجع بيتي
تابعت الزوجة حديثها قائلة: «بعد ما جوزي عرف إني حامل اتجنن وسابلي البيت ومعرفتلوش وقتها طريق دورت عليه في كل حته، سألت أهله وصحابه وملقتهوش في أي حته وفضلت طول فترة حملي قاعدة عنده أهلي هما اللي بيصرفوا عليا، دخلت أولد وهو مكنش معايا بعدها بفترة كلمني وقالي سامحيني وأنا ظلمتك وحقك ربنا خده مني، وعايزنا نرجع شان خاطر بنتي وافقت ساعتها وفرحت إني هرجع بيتي، مكنتش أعرف إن أهله اللي مرجعينه بالعافية».
قضايا محكمة الأسرة..عاملي محاضر ضرب
أنهت «وداد» حديثها قائلة: «بعد ما رجعتله لقيته نفس الحكاية مفيش حاجة اتغيرت طول الوقت كلام في التليفون وبيتأخر بره كتير ومعرفلو طريق معظم الوقت، ولو اشتكيت بقى يقولي ده اللي عندي ومبيصرفش على البيت ولا البنت خالص، وبعد كدة اكتشفت إنه عايش معايا وعاملي قضية ضم وعاملي محضر إني عورته وبيبعت المحاضر على عناوين غلط عشان معرفش استلمهم وكل ده وأنا معرفش ولما عرفت سيبته، وجيت المحكمة عشان أرفع عليه قضية نفقة ».
تابع أحدث الأخبار عبر
