أخبار محكمة الأسرة
سمية لقاضي الأسرة: رماني برة الشقة في انصاص الليالي ومبيصرفش على عياله
رفعت «سمية» دعوى نفقة في محكمة الأسرة على زوجها، واتهمته بالبخل رغم كونه ميسور الحال، وقالت إنه يتركزها وأبنائها دون إنفاق، لذا لجأت للمحكمة للحصول على نفقة لها ولأبنائها.
قصص محكمة الأسرة..وثقت في القرابة
قالت «سمية» في بداية حديثها: «أنا متحوزة من 13 سنة، وسايبة جوزي بقالي سنتين، اتجوزته عن طريق القرايب كان قريب جوز خالتي ولما شافني أعجب بيه واتقدملي، وأنا وأهلي وافقنا عليه على طول لأنه كان عريس مناسب ووثقنا في كلام القرايب، وخلفت منه ولدين والدنيا في الأول قبل الخلفة كانت كويسة ومفيش مشاكل معاه».
دعاوى محكمة الأسرة..على طول بيدعي الفقر
أكملت الزوجة حديثها وقالت: «جوزي كان مسافر وشغال برة مصر، وبيجي بس شهرين إجازة، ومن ساعة ما اتجوزته وهو بيقول إن ظروفه على قده ومش معاه وبيدعي الفقر، مع ان المفروض من شغله يكون معاه فلوس كتير، بس كنت بمشي الدنيا باللي بيدهوني ولو احتجت زيادة باخد من أهلي ».
حكايات محكمة الأسرة.. رماني عند الجيران
تابعت «سمية» حديثها قائلة: «المشاكل بينا زادت ,كل ما اطلب منه مصاريف للعيال يقول مش معاه وأنا لوحدي وشايلة مسؤوليتهم مش معايا حد، لحد آخر إجازة جه فيها لسه بتكلم معاه واعرفه أن العيال مصاريفهم كتيرة وهو محتاج يزود الفلوس، قالي دا اللي عندي وضربني وطردني في نص الليل، وملقتش حته اروحها اضطريت انام عند الجيران عشان مفيش مكان تاني اروحه لحد الصبح خدت ولادي وسافرت عند أهلي».
قضايا محكمة الأسرة..عايزة حق ولادي
أنهت «سمية» حديثها قائلة: «من ساعة ما طردني مرفعش علينا سماعة التليفون ولا بيسأل عايشين ازاي، ولادي معايا ومبيسألش فيهم، حاولت اكلم أهله عشان يعقلوه لكن مفيش فايدة محدش عرف يوصل لحاجة، وجيت المحكمة عشان ارفع عليه قضية نفقة ليا ولولادي حقنا، أنا عاوزاه يصرف على العيال بس ومش مهم الشقة والحاجة ».
تابع أحدث الأخبار عبر
