أخبار محكمة الأسرة اليوم
محكمة الأسرة اليوم.. وائل: سابت البيت عشان بقول لها نضفيه، وياسمين: عايش بالقسيمة بتاعتي في الحرام
ينشر موقع الحادثة، ضمن نشرة أخبار محكمة الأسرة اليوم ، أبرز القصص التي نشرت على مدار اليوم السبت، والتي تباينت بين زوجات وصل بهن الطريق إلى أعتاب محكمة الأسرة بحثا عن حقوقهن وأزواج لم يستطيعوا التأقلم مع زوجات لم يشفع لهن حسن المعيشة.
عجائب محكمة الأسرة.. منار: بحاول معاه يبطل المخدرات وفي الآخر ضربني بالشاكوش
دعوى خلع قصدتها منار بعد 9 سنوات في زواج فاشل حاولت على نجاحه مئات المرات ولكن الزوج كان مصر على إبطال كل محاولاتها بسبب إصرار على الاستمرار في طريق المخدرات ما جعلها تقصد محكمة الأسرة في النهاية بعد ما تدهورت الأوضاع، وقالت للقاضي: "استحملت على أمل إنه يتغير، بس ما فيش حاجة كانت بتحصل، تصرفاته كانت غريبة وبقى يضربني بأي حاجة ووصل بيه الحال إنه يضربني بالشاكوش، وكنت هاروح فيها لولا ستر ربنا، خفت على العيلين اللي حيلتي، ورفعت قضية طلاق عشان مش ضامنة هيعمل فيا إيه تاني".
حكايات محكمة الأسرة.. ياسمين: عايش بالقسيمة بتاعتي مع الستات في الحرام
7 سنوات عاشتها ياسمين في استقرار وسعادة، ولكن انقلبت حياتها رأسا على عقب في السنة الثامنة بعد ما اكتشفت خيانة زوجها الذي حاولت إصلاح المنزل بعدها، ولكنه رفض؛ ما جعلها تصر على قصد محكمة الأسرة من أجل رفع دعوى خلع، وتابعت ياسمين لقاضي محكمة الأسرة: "كنت متأكدة إنه بيخونني لما لقيته متغير معايا بقاله كتير، رحت له الفندق اللي شغال فيه، وعرفت إنه حاجز لواحدة في الفندق بقاله فترة، وفيه ناس قالت لي إنه متجوزها، بس اللي اكتشفته إنه ماشي معاها بالحرام بالقسيمة بتاعتي عشان يبقى باين إنه متجوزها مش ماشي معاها في الحرام، طلبت منه إنه يرجع للبيت وللعيال، بس هو مش راضي وهو ده اللي خلاني اروح محكمة الأسرة وارفع دعوى خلع".
محكمة الأسرة اليوم.. وائل: سابت البيت عشان بقولها نضفيه
دعوى إنذار بالطاعة لجأ إليها الزوج بعد مشكلات تصاعدت أدت لترك المنزل من قبل الزوجة، حاول عودتها لعش الزوجية، ولكنها أصرت على عدم العودة؛ ما جعل الزوج يلجأ إلى محكمة الأسرة لإقامة إنذار طاعة في النهاية لعله يكون هو الأمل في عودة حياتهما، ولكنه أتى بنتيجة عكسية، وجعل الزوجة تقصد محكمة الأسرة من أجل إقامة دعوى طلاق للضرر.
ةقال وائل للحادثة قائلة: "كنا عايشين عادي مفيش مشاكل بيننا كبيرة، كانت المشاكل العادية اللي موجودة بين أي اتنين، بس آخر فترة المشاكل زادت، وكلمتها كتير، بس هي مطنشة، وبقت تعند معايا، ما بقتش تنضف البيت، وكل ما آجي أكلمها تسيب البيت، آخر مرة سابت البيت ومش راضية ترجع خالص، حاولت أرجعها بدل المرة عشرة، وهي مصممة على رأيها برضو مش راضية ترجع".
عندما فقد الزوج الأمل في عودة الأمور كما هي قرر عمل إنذار طاعة، ولكن فاجأته الزوجة بعد بذلك بدعوى طلاق للضرر في محكمة الأسرة، واستكمل روايته قائلا: "عملت إنذار طاعة في المحكمة عشان ترجع لبيتها وعيالها وعشان خايف على مصلحة البيت، وبدل ما ترجع وتلم الدور راحت رفعت قضية طلاق للضرر وكأن إنذار الطاعة اللي أنا عملته ما لهوش أي لزمة".
كل شوية مع واحدة في شقة مفروشة.. سمر: مبيفكرش في حاجة غير الستات
تغاضت سمر كثيرًا عن خيانات زوجها، ولكن مع مرور الوقت كانت خياناته تتفاقم؛ ما جعل التأقلم عليها شديد الصعوبة، لذا بدأت التفكير في محكمة الأسرة من خلال رفع دعوى طلاق تنقذها، وقالت سمر للقاضي: "عديت كتير وجيت على نفسي عشان أحافظ على البيت، بس ما فيش فايدة برضو، بالعكس بيزيد، وكل يوم مع واحدة ولا فارق معاه ولا البيت، والموضوع بقى عمال بيزيد، وعلى طول يكلمهم في التليفون، وكل شوية يروح يقضي كام يوم في شقة مفروشة مع كل واحدة".
واختتمت حكايتها لقاضي محكمة الأسرة قائلة: "جبت أخري وهو مش بيفكر في أي حاجة غير الخيانة والستات وبس، لما لقيت ما فيش فايدة فيه وهو لسه زي ما هو رفعت دعوى طلاق بقالي 8 شهور"، ولا تزال القضية منظورة حتى الآن.
تابع أحدث الأخبار عبر
