«نسوانجي وأهله بلطجية».. رحمة للقاضي: خد مني عيالي عشان يحرق قلبي عليهم
13 عامًا عاشتهم «رحمة» مع زوجها الذي لم يقدرها أو يحترمها طوال حياتها معه فكان يخونها ويضربها وفي النهاية حرق قلبها على أطفالها هو وأهله.
خد مني عيالي عشان يحرق قلبي عليهم
تزوجت «رحمة» من قريبها وتوسمت فيه أن يكون رجل طيب تكمل معه حياتها وتكون معه أسرة، لكن زوجها كان يخونها أمام عينيها لسنين عديدة وإذا اشتكت الزوجة لم تجد سوى الإهانة والضرب، صبرت الزوجة على حياتها مع زوجها من أجل أبنائها وصحتهم النفسية، لكنها كانت مخطئة فكانت نهاية إهانة زوجها وأهله لها توجهها لمحكمة الأسرة عسى تجد حل لمشاكلها.
رحمة: اتجوزته زواج أقارب وبعد فترة بان على حقيقته
قالت رحمة: «أنا اتجوزت واحد قريبي من 13 سنة وخلفت منه ولد وبنت، ودلوقتي بقالي 4 شهور سايباه، سيبته بسبب الخلافات اللي بينا من ساعة ما اتجوزنا، في أول الجواز كان كويس ومفيش مشاكل، لكن بعد فترة اتغير وبانت حقيقته».
بيخوني وبيضربني عشان الستات اللي بيكلمهم
تابعت رحمة: «من زمان وجوزي بيكلم ستات وبيخوني معاهم، الأول كان بيداري لكن بعد كدة بقى يكلمهم قدامي عادي، كنت الأول بكدب نفسي وصحابي كانوا بيقولوا أنه بيعرف عليا ستات ومكنتش بصدقهم، كان بيشرب مخدرات بس مش كتير وكان بيصرف علي أنا والعيال الصراحة، فوق الخيانة كان بيضربني من زمان وأنا كنت صابرة وساكتة عشان خاطر العيال».
ضربني علقة هو وأهله
أكملت رحمة: «اتحملت كتير وكنت بسكت وأعدي عشان الدنيا تمشي، لحد في مرة لقيت حماتي بتكلم واحدة هو يعرفها عليا بتسلم عليها وبتكلمها كأنهم أهل، لما لقيت حماتي بتكلمها وتسلم عليها صعب عليا نفسي، عملت معاهم مشكلة وقلت ازاي يعملوا معايا كدة، ساعتها هو واخواته وامه وابوه اتلموا عليا و ضربوني»
أنهت رحمة كلامها: «بعد اللي حصل ده كان لازم أسيبه ومرجعلوش تاني، لما جيت امشي خد مني عيالي ومرضيش إني أخدهم معايا عشان يحرق قلبي عليهم، من ساعة ما سيبته معرفش عنه او عن عيالي حاجة خدهم مني، انا رافعة قضية حضانة عشان أقدر اخدهم تاني يعيشوا معايا عايز يطلقني أو ميطلقنيش براحته مبقاش فارقلي المحكمة هتجبلي حقي هو أصلًا محاولش يرجعني ومتكلمناش من ساعة ما مشيت.»
تابع أحدث الأخبار عبر
