"بيخونني من 19 سنة كل يوم مع واحدة".. سمية للقاضي "ولادي مرات أبوهم مسودة عيشتهم"
مثل العديد من السيدات أمام محكمة الأسرة تواجدت «سمية» مكسورة وحزينة بسبب السنين التي عاشتها وملأها القهر والدموع مع زوج ضيع عمرها وهو يستنزفها، ويجعلها تشعر بالنقص وأنها ليست كافية كزوجة لزوجها.
تزوجت «سمية» من 19 سنة عن طريق جواز صالونات، وتوسمت فيه أن يكون نعم الزوج والأب لها ولأطفالها، ولكن طوال سنين زواجها عانت معه بسبب خيانته المستمرة لها، لمدة 17 سنة تحملت خيانة زوجها وأقنعت نفسها أن جميع الرجال في طبعهم الخيانة، وأن حياتهم طبيعية بهذا الشكل، حتى فاض بها الكيل من هذا الحال ومن شعورها بالتعاسة الدائمة وأنها ليست كافية أبدا لزوجها، وتوجهت في النهاية لمحكمة الأسرة لتضم أبناءها وتعوضهم عن سنين الحزن والشقاء التي عاشوها مع أبيهم.
«سمية»:جوزي بيخونني بقاله 19 سنة
قالت «سمية»: اتجوزت من 17 سنة وسبت جوزي من سنتين، كان جواز صالونات، والحياة كانت ماشية لأني كنت ممشياها وباعدي عشان أعيش وأربي ولادي، لكن جوزي كان بيخونني من ساعة ما خلفت ابني الكبير اللي عنده 19 سنة دلوقتي، يعني بقاله 19 سنة بيخوني.
وتابعت «سمية»: استحملت أعيش وأنا عارفة إنه بيخونني وكنت باطنش عشان أربي ولادي وقلت كل الرجالة كده، والدنيا كانت ماشية، جوزي زاد في خيانته بقى كل يوم بيكلم واحدة مختلفة، كنت باعرف أنه بيخونني من تليفونه، كان أول ما تليفونه يرن يجري ويرد عليه من ورايا في حتة بعيد عشان ما اسمعش، وكنت باحس إن فيه واحدة تانية في حياته من غير حتى ما أشوف التليفون، لما أواجهه يا إما ينكر يا إما يعتذر ويقول لي مش هيتكرر تاني، وفي الآخر لما كنت باواجهه مكنش بينكر، كل بني آدم عنده طاقة تحمل، وأنا جبت آخري وفاض بيا، وقررت أسيبه لما ولادي كبروا وبقوا يقدروا يعتمدوا على نفسهم، لأني مبقتش أحس معاه بالأمان وخلاص مبقتش عايزاه.
اقرأ أيضا
«سمية»:جوزي أخد شقتي واتجوز فيها
وأكملت «سمية» كلامها والدموع في عينيها: طلبت الطلاق لما سبت البيت ورفض يطلقني، رفعت خلع عشان أخلص منه، وورقة الخلع استلمتها بقالها 10 أيام، خدت بنتي الصغيرة اللي عندها 9 سنين وعشت مع أمي، وسبت ولادي الكبار 19 و15 سنة عايشين مع أبوهم يشيل مسئوليتهم، لكن مرات أبوهم مبهدلاهم وبتعاملهم أسوأ معاملة، لما ولادي حكوا لي اللي بتعمله فيهم، قررت ألم عيالي في شقتي وأربيهم وأعوضهم عن اللي شافوه، ودلوقتي رفعت دعوى تمكين من الشقة اللي كنت متجوزة فيها؛ لأن جوزي أخد الشقة وعايش فيها مع مراته الجديدة، والشقة دي أبويا اللي بناها وسابها لي عشان أعيش فيها أنا وجوزي وعيالي، ما كانش يعرف اللي جوزي هيعملوا فيا.
تابع أحدث الأخبار عبر
