فاطمة في دعوى خلع: "كان نفسي أهرب من عذاب أبويا لقيت جوزي أسوأ منه"
أرادت «فاطمة» أن تهرب من الجحيم الذي عاشته مع أبيها الظالم الذي لم ترَ معه الحب أو الرحمة، وظنت أنها عندما تتزوج ستتغير حياتها، وتصبح جنة مع من اختاره قلبها، ولكن تحول حلمها لكابوس أليم، ولم تتغير حياتها إلا للأسوأ.
تزوجت «فاطمة» من زوجها وهي مازالت شابة صغيرة في سن الـ 18، وصممت على الزواج؛ لأن حياتها مع والدها كان يملؤها الألم والدموع والعنف، ظنت عندما تتزوج أنها ستهرب من عذاب والدها، ولكنها فوجئت بصدمة عذاب زوجها، فكان تعذيب زوجها لها أشد مليون مرة من عذاب والدها، وجعلها تكره حياتها وتتمنى الموت، ولكن قررت «فاطمة» أن تفعل مع زوجها ما لم تستطع فعله مع والدها، وهو أن تنقذ حياتها، وبدأت في إجراءات إنهاء حياتها مع زوجها، ولجأت في النهاية لمحكمة الأسرة.
اقرأ أيضا
«فاطمة»: جوزي كان شخص كويس مقدرش أنكر لكنه عيبه إن عصبيته لا تحتمل
قالت «فاطمة»: "اتجوزت وأنا عندي 18 سنة، ودلوقتي عندي 27 سنة، وسبت جوزي من سنتين، أبويا كان راجل شديد جدا وعنيف، كان بيضربني وبيضرب والدتي وكنت مستنية اتجوز عشان اسيب له البيت وأبعد عنه، اتجوزت أول واحد حبيته واتقدم لي وكان كويس في الأول، وما يبانش عليه أي حاجة مش كويسة، جبت منه ولدين، وهو كان شخص كويس مش وحش، ما اقدرش أنكر، لكنه عيبه إنه عصبي وعنيف جدا".
«فاطمة»: ما كانش بيبطل ضرب غير لما يغمى عليا
وصفت «فاطمة» شكل حياتها مع زوجها وقالت: المشاكل كانت من ساعة ما اتجوزنا، بدأت العصبية والضرب والشتيمة ومش عايز يصرف في البيت، الضرب كان لا يحتمل ما يسبنيش غير وانا متعورة، ويحاول يخنقني عشان يموتني، العصبية كانت بتوصله إنه بيضربني لحد ما يغمى عليا، استحملت وقلت هو طبعه كده، وهو كان بيتراجع ويرجع يعتذر ويندم، كنت بستحمل لأني كنت ما كنتش عايزة اتطلق وأسيب جوزي وارجع أعيش مع والدي اللي كان صعب جدا ومعاملته صعبة، وما كنتش عايزة أرجع للبهدلة اللي كنت شايفاها معاه تاني.
«فاطمة»:أبو ولادي ضرب أمي وهي بتحوش عني
وتابعت «فاطمة»: أبويا وأمي اتطلقوا بسببه؛ لأنه ضرب أمي في مرة وهي بتحوش عني، حصل مشكلة بين أمي وأبويا؛ لأنه ما جبلهاش حقها، أبويا ما كانش بيقدر يديني حقي قدام جوزي عشان عارف إنه زيه وبيعمل نفس عمايله، قررت أسيب جوزي لما خفت على ولادي يطلعوا زيه، لما لقيت ابني اللي عنده 4 سنين بيقلد أبوه بيزعق ويكسر في الشقة خفت في يوم من الأيام أصحى ألاقي ابني عنده 15 سنة بيضربني، وقلت لما يبقى أبوهم وأمهم متطلقين وفي احترام مع بعض أحسن ما نبقى مع بعض وشايفين الضرب والإهانة دي حاجة عادية، أنا كبرت في بيت لقيت أبويا وأمي كده، وحصل لي عقده بسببهم".
وأضافت «فاطمة»: رفعت عليه دعوى خلع، المشاكل والغلط لسه موجودين بس ما بقاش يقدر يضربني زي الأول، عايشة مع والدتي، وباشتغل وباصرف على ولادي، ومؤخرا بقى ييجي ياخد الولاد خميس وجمعة يشوفهم.
تابع أحدث الأخبار عبر
