أخبار محكمة الأسرة
«القديمة حليت في عينه».. كوثر : طلع متجوزني عشان الخلفة بس
وافقت «كوثر» أن تكون الزوجة الثانية في حياة زوجها وهي تأمل أن تعيش حياة مستقرة مع زوجها وتنشئ معه أسرة، ولم تكن تعلم أبدا أنها ستتواجد في النهاية على أبواب محكمة الأسرة تبحث عن حقوقها التي منعها عنها الزوج لانشغاله بالرجوع لزوجته الأولى وتركه لها بعد ان أنجبت له اطفال.
قصص محكمة الأسرة..كان متجوز قبلي قريبته
قالت «كوثر» في بداية حديثها: «أنا متجوزة بقالي 11 سنة، جوزي مكنش يعرفني قبل الجواز، شافني وسأل عليا واتقدملي، في الخطوبة عرفت انه كان متجوز قبل كدة واحدة قريبته ومخلفس منها وفهمني انه طلقها وده سبب طلاقهم، اتجوزنا وخلفت بعد ما اتجوزنا على طول».
دعاوي محكمة الأسرة..أهله مش بيحبوني
أكملت كلامها قائلة: «بعد الجواز الدنيا كانت تمام خلفت منه 3 عيال ولدين وبنت، كانت كل حاجة كويسة هو بيشتغل وبيصرف وانا كنت قاعدة في البيت،. المشاكل بينا كانت عادية مش كبيرة، اهله مكنوش بيحبوني لأن مراته اللي طلقها قريبتهم وهما كانوا بيحبوها ومش عايزينهم يتطلقوا، كمت بالنسبالهم خدت مكانها».
حكايات محكمة الأسرة..جوزي اتغير
تابعت حديثها قائلة: «حصلت مشاكل كتير مع أهله بسبب أنه مش بيحبوني وبيتلككو يعملوا مشكلة معايا بسبب ومن غير سبب، كنت بكبر دماغي وأنا كنت بعيدة عنهم وقلت معملش مشاكل عشان خاطر ولادي، من سنة تقريبا جوزي بدا يتغير معايا وبقى يبات كتير برة البيت ومكنتش عارفة ايه اللي حصلوا».
قضايا محكمة الأسرة.. قضية نفقة
أنهت حديثها قائلة: «لحد ما اكتشفت انه رجع بكلم مراته القديمة وردها على ذمته وأنا معرفش وأهله طبعا اللي شجعوه على كدة وهما اللي عرفوني، ولما واجهته مأنكرش ومرضيش يطلقها وقال انه بيحبها واتجوزني عشان الخلفة وبس، ومن ساعتها وانا عند اهلي وهو مبيسالش فيا ولا حاول يرجعني حتى عشان خاطر العيال، وحتى ولاده بيشوفهم بس مبيصرفش عليهم عشان كدة رفعت عليه قضية نفقة».