أخبار محكمة الأسرة اليوم
«سقيني العذاب ألوان».. كاميليا في طلاق للضرر: استغل مليش ضهر وبيستقوى عليا
رفعت «كاميليا» دعوى طلاق للضرر في محكمة الأسرة على زوجها الذي استغل عدم وجود ضهر لها وسند في الدنيا بعد وفاة والدها وأسقاها العذاب ألوان، هربت الزوجة منه لأنها خافت من أن تكمل حياتها في عذاب زوجها واضطرت الزوجة وقتها أن تتخذ قرار صعب وهو ترك لناتها مع زوجها الذي انعدمت الرحمة في قلبه حتى يتحمل مسؤوليتهم، ومنعها من رؤيتهم حتى يعاقبها على توجها لمحكمة الأسرة.
قصص محكمة الأسرة.. رافض يسبني في حالي
قالت «كاميليا» في بداية حديثها: «أنا متجوزة من 9 سنين ومخلفة من جوزي بنتين، أنا وهو كنا جيران وساكن في الشارع اللي ورانا، أنا منفصلة عنه بقالي سنة بس مطلقناش، هو رافض يطلقني ويسبني في حالي».
دعاوي محكمة الأسرة.. افترى عليا عشان أبويا مات
أكملت «كاميليا» حديثها وقالت: «مشاكلي مع جوزي بدأت من 6 سنين في أول 3 سنين كان كويس ومفيش مشاكل كتير بس بعد كدة اتغير وبقى واحد تاني وكان السبب إن والدي اتوفى، فضلت كتير مستحملاه عشان مخربش بيتي وأبهدل بناتي، من زمان وهو بيضربني وبيغلط ويقل أدبه كتير بس مش زي بعد وفاة أبويا بقى أكتر من الأول، استغل عن مفيش حد هيقف قصاده ولا يدافع عني».
حكايات محكمة الأسرة.. بيشرب مخدرات من زمان
تابعت الزوجة حديثها قائلة: «فوق كل ده كان بيشرب مخدرات من زمان عرفت لما شفته وهو بيشربها حاولت معاه إنه يبطل لكن مفيش فايدة معاه، مرضيش وأنا قلت خلاص مادام ملوش دعوة بمصاريفي أنا وولادي يبقى خلاص اسيبه، بس كانت بتجننه أكتر لحد أخر مشكلة حصلت بينا، ضربني بسبب العلاقة لأني كنت رافضة وقتها ضربني غير كل مرة كان هيموتني».
قضايا محكمة الأسرة.. سايباله البنات عشان يشيل مسؤوليتهم
أنهت «كاميليا» حديثها قائلة: «وقتها سيبته ورحت بيت أخويا وسيبتله البنات عشان يشيل مسؤوليتهم ولا يصرف عليهم هو مكنش بيصرف عليهم واحنا مع بعض أكيد مش هيصرف لما أمشي واسيبه، ومن ساعة ما سيبت البيت مش مخليني أشوف الولاد بيعاقبني عشان اتنازل عن كل المحاضر اللي رافعاها عليه وقضية الطلاق للضرر».