أخبار محكمة الأسرة اليوم
عجائب محكمة الأسرة.. سمر: بايتني عند أهلي عشان طلبت 35 جنيه
عكس العديد من السيدات التي توجهت إلى محكمة الأسرة حتى ترفع دعاوى على أزواجهن، كان سبب تواجدت «سمر» حتى تتنازل عن دعوى الخلع التي رفعتها على زوجها بعد غصب زوجها عليها.
منذ زواج «سمر» لم تعيش يوم سعيد مع زوجها، وصبرت عليه لمدة 7 سنين وهي تأمل أن تجد طريقة تستطيع التعامل بها مع طريقته الصعبة، ولكن فشلت كل محاولتها وعادت لأهلها بعد ضرب زوجها لها عندما طلبت لبن لابنتها.
قصص محكمة الأسرة.. أنا اللي برجع اصالحه
قالت الزوجة: «أنا متجوزة بعد قصة حب من 7 سنين، من أول جوازي وأنا في مشاكل مع جوزي في الأول كانت من غير سبب لكن بعد كدة كانت بسبب خلافات زي كل المتجوزين، وكنت بكبر دماغي وارجع صالحه دايما حتى لو مش غلطانة عشان امشي اموري ومخربش بيتي».
دعاوي محكمة الأسرة.. ضربني عشان كيلو لبن لبنته
أكملت حديثها: « بعد الجواز مخلفناش على طول وكنا مشغولين في اللف على الدكاترة وده اللي خلانا منسيبش بعض من زمان لحد ما حملت في بنتي وخلفتها، بعد ولادتها بوقت قصير المشاكل زادت أوي بقى مبيصرفش خالص وعلى طول بيزعق وبيتخانق ومفيش حاجة عاجباه وأنا معملتش حاجة غلط، لحد اخر مشكلة حصلت بينا كانت بسبب إني طلبت منه لبن صناعي لبنتي وقتها رفت وأنا اتخانقت معاه وزعقت وده اللي خلاه ضربني وحلف إني مش هبات في البيت».
حكايات محكمة الأسرة.. هيخلوني اتنازل عن قضية الخلع
ظنت الزوجة أنه عندما تترك زوجها ستتحسن حياتها وتنتهي مشاكلها ولكن حدث عكس المتوقع ووجدت نفسها مضطرة ان تعود للجحيم.
أنهت «سمر» حديثها باكية: «بعد ما سيبت البيت عملت كل حاجة عشان اعرف اطلق لكن مفيش فايدة، رفض يطلقني عند المأذون، وقتها جيت المحكمة عشان ارفع عليه قضية خلع، لما رفعت عليه قضية كلم اهلي وفهمهم انه مش عايز يخرب بيتي ومش هيعملي حاجة تاني وهينفذ كل طلباتي وضحك عليهم، وخلاهم يغصبوني اجي المحكمة اتنازل عن القضية وارجعله تاني بالغصب يا إما هيطردوني هما كمان».
