أخبار محكمة الأسرة اليوم
عنيد ومسيطرة عليه نزواته.. ضحى لـ محكمة الأسرة : مخليني زي البيت الوقف
بعد خلافات عديدة مع الزوج كانت ضحى على أبواب محكمة الأسرة ولكن لم ترفع هي القضية بل رفعها زوجها عليها، تزوجت ضحى على أمل أن تدخل القفص الذهبي مع فارس أحلامها، لكن عندما اصطدمت بالواقع اكتشفت أنه بعيد كل البعد عن حلمها الذي طالما أرادت تحقيقه.
كانت حياة الزوجة مع زوجها صعبة ولكنها اعتقدت أن الحياة الزوجية كلها بهذا الشكل ولم تتوقع أبدًا أن تصل في النهاية لمحكمة الأسرة وهي تحمل كل هذا الألم والوجع.
قصص محكمة الأسرة.. اتجوزت جواز صالونات وقعدت في البيت
قالت «ضحى» في بداية حديثها: «أنا اتجوزت من 2015 خلفت من جوزي بنتين، كان جواز صالونات ومكنش فيه مشاكل الأول والدنيا كانت كويسة الأول جوزي كان هو اللي بيشتغل ويصرف عليا أنا والعيال وأنا كنت قاعدة في البيت وبربي العيال».
حكايات محكمة الأسرة.. جوزي بيخوني وأنكر لما واجهته
تابعت «ضحى» حديثها قائلة: «من سنة تقريبا جوزي لقيته بدأ يتغير على طول بيتكلم في التليفون وبيتأخر برة ومعرفش عنه حاجة شكيت فيه إنه بيخوني، ولما فتحت تليفونه اتأكدت إنه بيخوني فعلا، ولما واجهته أنكر وقالي محصلش وإنه مظلوم لكن أنا كنت عارفة إن فيه حاجة بتحصل غلط».
دعاوي محكمة الأسرة.. جوزي مش عايزني وعايز يخلص مني
أضافت الزوجة: «بعدها بقى يجيلي مكالمات من ست بتقولي أنها على علاقة بجوزي ومصدقتهاش، لحد ما في مرة شفته مع واحدة وكان خارج معاها وقتها مواجهتش خدت بناتي وسيبت البيت ومشيت، حاول جوزي في الأول يرجعني وأنا اللي رفضت ولما قعد مع أهلي بعدها قال إنه مش عايزني خلاص وهيطلقني ويديني مصاريف بناته وكل واحد يشوف حاله».
قضايا محكمة الأسرة..جوزي عمل إنذار بالطاعة وهو عايز يطلقني
أنهت «ضحى» حديثها قائلة: «بعد ما قال إنه هيطلقني اتفاجئت إنه عمل إنذار بالطاعة، وجيت المحكمة عشان أقدر اعتراض على انذار الطاعة وأمشي في إجراءات قضية الطلاق، أنا كان ممكن أرجعله لو رجع واعتذرلي وقال إنه مش هيعمل كده تاني لكن هو معملش كدة هو فضل مكمل في العند وفي علاقاته بالستات».