أخبار محكمة الأسرة
محكمة الأسرة .. هدى: خفت على بنتي من جوزي العيشة معاه كلها إهانة
كانت محكمة الأسرة هي ملجأ «هدى» الذي توجهت له حتى تحتمي من شرور الدنيا التي واجهتها مع زوجها الذي ظلمها وعاشت معه حياة يملأها الوجع والألم، تحملت الزوجة معاملة زوجها الصعبة عندما كانت وحدها لكن عندما كرمها الله بابنتها قررت أن تتخلص من مصدر الألم في حياتها حتى لا تعيش ابنتها نفس الحياة الصعبة.
قصص محكمة الأسرة
بدأت «هدى» حديثها وقالت: «أنا اتجوزت من 18 سنة عندي من جوزي بنت واحدة بس وسايباه من 8 سنين، متطلقناش من ساعتها، مكملناش 5 سنين مع بعض كل شوية اسيب البيت واروح عند أهلي بسبب عمايله، اتعرفت عليه كان صاحب أخويا، في الأول كان كويس ومفيش مشاكل لكن بعد الجواز وشه الحقيقي بان.»
حكايات محكمة الأسرة
تابعت «هدى»: «المشاكل معاه من زمان كان معاملته مش كويسة بيضربني ومبيصرفش عليا غير على القد، بيضربني من ساعة ما اتجوزنا بسبب ومن غير سبب وضرب شديد يموت، حاولت معاه كتير إنه يتعدل مفيش فايدة وسيبته كتير ونويت أتطلق كذا مرة ، كل مرة أرجع على أساس انه يتغير بس مفيش فايدة مبيتغيرش يتعدل يومين وبعد كدة يرجع لحاله.»
دعاوي محكمة الأسرة
أكملت «هدى»: «اتحملت ضربه وبهدلته ليا عشان مخربش بيتي، واديته كذا فرصة إنه يتعدل، والأهالي كانوا بيقنعوني إني اديله فرصة تانية واسامحه، كنت برجعله وأعدي لكن مكنش فيه تغيير، طول الفترة اللي كنا فيها مع بعض مخلفتش غير في السنة الخامسة بس ولما ربنا رضاني ببنتي سيبته ومرضيتش ارجعله تاني.»
قضايا محكمة الأسرة
أنهت «هدى» حديثها بالدموع: «ضربني وأنا لسه فايقة من الولادة وقتها قررت مكملش معاه لأنه بني أدم بخيل وتعامله وحش ميتعاشرش، رفعت عليه قضية طلاق ضرر، مبيسألش خالص من ساعة ما سيبته ومبيصرفش عليها هو أصلا مكنش بيصرف وانا معاه متوقعتش إته يصرف بعد ما سيبته، أنا سيبته عشان خاطر بنتي متكبرش في الجو ده إنها تشوف أمها كل شوية بتضرب، رفعت عليه قضية طلاق للضرر وقضايا نفقة عشان أخد حقي منه، ومن ساعة ماسيبته معرفش عنه حاجة.»