فدوى في دعوى خلع: جوزي مش مناسب ينفعش أب لأبنه ولا زوج ليا
تزوجت «فدوى» زواج سريع وكانت تظنه سيكون زواج العمر لكنها كانت مخطئة لأن زيجتها لم تكمل سوى ال 4 سنوات وانتهت كما لم تتوقع في محكمة الأسرة.
فدوى بدعوى خلع
تعرفت «فدوى» على زوجها عن طريق اخته التي كانت تعمل معها وتمت خطبتها على أخيها، التي لم تستمر سوى بضعة أشهر وتم الزواج سريعا ومنذ الزواج بانت حقيقة الزوج وأنه كان مختلف تماما في طباعه عن «فدوى» وكان شخص مختلف عما ظنت أنه سيكون، وبعد 3 أشهر فقط من الزواج تركت الزوجة زوجها وهي حامل لأنها علمت أن الحياة مع زوجها ليست الحياة التي تخيلتها لنفسها، وتوجهت لسنين لمحكمة الأسرة حتى تحصل على حقوقها وحقوق ابنها.
اتعرفت على جوزي عن طريق اخته
قالت فدوى: «أنا متجوزة من أكتر من 4 سنين قعدت مع جوزي 3 شهور بس جبت منه ولد واحد، اتعرفت على جوزي عن طريق اخته كان عندي مكان بيزنس ومأجره مكانه من أخته وعرفته ساعتها عن طريقها».
اتصدمت في جوزي بعد الجواز
تابعت فدوى: «اتخطبنا مدة قليلة أوي مطولناش كنت واثقة فيه وحبيته عشان كدة وافقت عليه واتجوزنا، من ساعة ما اتجوزته وعرفت انه مكنش ينقع اتجوز الشخص ده مش شبهي خالص لا في طباعه ولا تربيته ولا كنا متوافقين في أي حاجة»
دعوى خلع
أكملت الزوجة: «سيبته بعد 3 شهور جواز بس، مكنش بيضربني أو يغلط فيا، بس عدم التوافق والمشاكل كتير بانت من بعد الجواز خلتني مش عارفة أكمل ولا اتعايش معاه ، سيبته وأنا حامل في ابني، ورفعت قضية خلع لأنه مهتم بالماديات مرضيش يطلق ودي عشان معرفش أخد حاجة من حقوقي»
دعوى زيادة نفقة
أضافت فدوى: «معرفش عنه حاجة من ساعة الطلاق، ورفضت أخليه يشوف الولد ودي لأنه مش هينفع اب لأبني قلتله ممكن يشوفه عن طريق المحكمة، ورفعت عليه قضية نفقة لأنه مبيصرفش على الولد نهائي أنا أصلا اللي كنت بصرف واحنا متجوزين، وهو ساب شغله اللي كان في مكان قبضه محترم عشان ميدفعش النفقة ساب الشغل بعد ما رفعت النفقة ب8 شهور ، جاية عشان ارفع قضية زيادة نفقة ».