خلى البيت على الحديدة.. حنان: "سرق كل حاجة حتى هدومي أنا والعيال"
دعوى طلاق كانت هي الوسيلة الأخيرة لإنقاذ حياة حنان بعدما حاصرتها المخدرات وعواقب الإدمان التي تمثلت في تكاسل الزوج عن العمل وتحملها مسئولية المنزل بالكامل، صبرت وتحملت من أجل الأولاد ولكن دون جدوى بعدما لجأ لسرقة كل أغراض المنزل وبيعها من أجل شراء مزاجه حتى ملابسها هى وأولادهما.
حنان: "سرق كل حاجة في البيت حتى هدومي أنا والعيال"
محاولات فاشلة من قبل الزوجة تحاول فيها معالجة الزوج من إدمانه الذي دمر حياتهما الزوجية من بداياتها، مؤكدة على أنه كان شخص جيد السمعة خلال فترة الخطوبة، بدأت الزوجة في قصتها قائلة: "قريبنا من بعيد وأمي وأمه قالوا نجوزهم لبعض وأنا كنت شايفاه كويس فوافقت على طول واتخطبنا قعدنا سنة وبعدين اتجوزنا، و يدوب اتجوزنا من هنا وشفت واحد تاني خالص غير اللي أنا أعرفه".
أضافت: "من تاني شهر وأنا عرفت إنه بيشرب مخدرات ولما جيت اتخانقت معاه قال لي أنا حر وأعمل اللي أنا عايزه، ومن تاني شهر جواز وأنا مشوفتش معاه يوم عدل بسبب ضربه ليا اللي بسبب ومن غير سبب، كل شوية اسيب البيت بس لما خلفت بقيت استحمل واصبر على أمل إنه يتعدل".
كل ما أوديه مصحة يهرب منها
كانت الزوجة كلها أمل في تغير الزوج للأفضل خصوصًا بعد إنجابها للأطفال ولكن في الحقيقة لا يحدث أي تغير إلا للأسوأ فقط، فكان الزوج يتمادى في إدمانه يوم بعد يوم لدرجة وصلت أنه باع كل أغراض النزل من أجل مزاجه الذي هو أهم شيء في حياته حتى أهم من أولاده اللذين كان يتركهم دون أي طعام، أكملت الزوجة: "حاولت معاه مرة واتنين وتلاته إني أعالجه بس كل مرة كان بيهرب من المصحة بعد كام يوم ويرجع للمخدرات والقرف تاني، كنت بصبر عشان خاطر العيال واستحمل ضربه ليا وأعدى كتير وأقول معلش بس مفيش حاجة بتتغير".
خلى البيت على الحديدة
تولت الزوجة مسئولية المنزل والأولاد بالكامل بعدما تدهور حال الزوج بسبب تعاطيه الذي جعله يسرق كل أغراض المنزل ويبيعها لكي يشتري مزاجه، تابعت حنان: "طبعًا ميعرفش حاجة عن العيال وأنا اللي شايلة البيت على كتفي لوحدي، وياريته قاعد في البيت وساكت لا بيسرق كل حاجة تقابله في البيت عشان يبيعها ويجيب بيها مخدرات، خد هدومي وهدوم العيال وباعها وبعدين دخل المطبخ وباع الحلل وأي حاجة في البيت ينفع تتباع بيبعها، لحد مابقاش في حاجة تاني في البيت تتباع خلاص".
انهت الزوجة قصتها: "مفيش فايدة فيه وتعبت معاه خلاص، حاجة البيت كلها خدها وأنا كدا كدا أنا اللي بصرف على البيت والعيال وهو ملهوش لازمة، رفعت قضية طلاق عشان أخلص من العيشة اللي تقرف معاه".