منال في دعوى خلع: "بيخرف بالكلام ومطلع عليا إن مشي بطال"
دعوى خلع لجأت إليها منال بعد حياة سعيدة عاشتها في عش الزوجية وهي مقتبل عمرها مع الشخص الذي اختاره قلبها، زوج يفعل أي شيء من اجل إرضاء زوجته، وزوجة تعيش في رضا تام مع حبها الوحيد، ولكن لم تستمر الحياة الوردية كثيرًا وانقلب كل شيء وتحولت سعادتها الغامرة لتعاسة تحاوطها من جميع الجهات، بعدما تحول الزوج لشخص اخر لا تعرفه الزوجة.
عشت أحلى 6 سنين في عمري
تحول غريب شهده زوج منال جعلها تفكر في أن محكمة الأسرة هي الأمل الوحيد لها لكي تنقذها من تعاستها التي تعيشها معه، بدأت منال تروي قصتها لقاضي المحكمة عسى ان يكون السبب في نجاتها من حياتها المنهكة، قالت: "بنحب بعض من زمان أوي وأهلي وأهله عارفين بقصة حبنا، وبعد ما اتخرجنا على طول كانوا هما السبب الللي خلونا نتخطب على طول".
تابعت: "اتخطبنا وكانت أحلى فترة في عمري وحتى لما اتجوزنا قعدنا 6 سنين زي الفل، ومفيش خناقات بينا كتير خالص وكل الناس كانت بتحسدنا على حبه ليا وحياتنا اللي مكنش حد عايشها، كل حاجة كنت عايزاها كان بيجيبهالي".
القلق يحاوط الزوجة بسبب تصرفات الزوجة
بدأت القلق يحاوط منال بسبب تغير الزوج الملحوظ والغير مبرر، معاملة قاسية بدأ يتبعها الزوج معها وتصرفات غريبة تصدر عنه كل يوم جعلت الزوجة لا تصدق أن هذا الشخص حب عمرها والذي تمنت أن تعيش معه عمرها كله.
أضافت: “أول 6 سنين كانت كل حاجة تمام بس بدأت أشوف واد تاني غير اللي أنا عرفاه من زمان، معاملة بقت زي القرف وضرب شتيمة طول الوقت، مكنتش مصدقة إنه يعمل كدا”.
أكملت الزوجة حديثها: "سكت وعديت عشان معملش مشاكل وعشان مكنتش فاهمة إيه اللي بيحصل وكنت متأكدة إن في حاجة غلط، بس بدأ يزيد في ضربه ليا ومش بس كدا، كمان بقا بيخرف بالكلام ويقول كلام أنا مش مصدقة إنه طالع منه".
مطلع عليا سمعة زي الزفت في المنطقة
صدمة تلقتها الزوجة في الشخص الذي ظنته حب عمرها بعدما اختلق شائعة عليها أنها سيئة السمعة، كانت هنا قصة زواجهما كتبت نهايتها وقررت رفع دعوى خلع، تابعت منال: "عديت ضربه ليا في الأول مكنتش فاهمة إيه اللي بيحصل وقلت أكيد في حاجة غلط بس الموضوع بيزيد، دا غير إنه بقى يقول لي اتي عارفة حد علي، مصدقتش نفسي إن يقول لي كدا بس عرفت من الناس إنه مطلع علي سمعة أصلاً إني بكلم رجالة وماشية مشي بطال".
أنهت الزوجة حديثها بعدما ملأت الدموع عينها: "كان حب عمري وكانت الناس بتحسدنا عليها مش عارة إيه اللي حصل، مش عارفة بيشرب مخدرات ولا لأ بس مبقاش طبيعي، ومقدرتش أكمل يوم واحد زيادة معه، ورفعت دعوى خلع بقالي 3 شهور ولسة ماشية في الإجراءات".