«سناء» في دعوى خلع: كسر ضلوعي وضيع عيني اليمين من كتر الضرب
تزوجت «سناء» ابن خالتها وظنت أنه سيحافظ عليها ويحميها من غدر الأيام، وتركت أهلها ومنزلها في أسوان ذهبت وراءه للقاهرة لتبقى معه لكن حياتهم تغيرت للأسوأ وابن خالتها الذي تحركه المخدرات دمر حياتها وجعلها تتمنى أنها لم تتزوجه يوما.
بعد زواج 4 سنين وإنجاب طفلة عمرها 3 سنوات لجأت «سناء» لمحكمة الأسرة لترفع دعوى خلع على زوجها الذي سيطرت المخدرات على عقله وأصبحت لغته الضرب والإهانة لها ولم تشعر معه أنها زوجة ولكن عبدة تهان وتركته بعدما فاض بها الكيل وطفح ولم تستطع التحمل أكثر.
«سناء» للقاضي: لما حاولت أرجع لجوزي غير الكالون
قالت «سناء» من على أعتاب محكمة الأسرة: المشاكل بدأت من تاني سنة جواز كانت مشاكل عادية لكن طباعه هي اللي كانت صعبة وكان بيضربني وبيبهدلني، ومكنش بيصرف علي كان بيعد من الشغل وأنا بشتغل وبصرف في البيت علي وعلى بنتي ولما المشاكل كانت بتكتر كنت بغضب عند أختي وأعد عندها بالـ 25 يوم وميسألش علي أنا أو بنته عايشين إزاي أو بنصرف منين، ومرة غضبت لما كنت عايزة أرجعله عشان أعيش واربي بنتي غير الكالون وطردني.
تابعت «سناء» كلامها على مشاكلها مع زوجها وقالت: الضرب كان بيزيد أكتر بسبب ومن غير سبب عملي قبل كده تمزق في الأربطة وشرخ في الضلوع وبقيت مبشوفش بعيني اليمين بسبب ضرب جوزي لي.
لم تستطع «سناء» تحمل هذه الحياة مع زوجها لكنها كانت مضطرة أن تتحمله لأنه لم يكن لها أي أحد في القاهرة غير زوجها وحتى عندما حاولت تركه كانت تعود من أجل ابنتها.
قالت «سناء» عن تعاطي زوجها للمخدرات: كان بيشرب مخدرات من قبل ما اتجوزه وكنت عارفة بس أهلي قالولي ابن خالتك وإزاي مترضيش بيه، بعد الجواز بقى يتعاطى أكتر بيصرف فلوسه على المخدرات، كل لما أكلمه وأقوله إنه يبطل يوافقني ويبطل يومين ويرجع ويتعصب علي ويضربني لما يرجع للمخدرات.
مسحت «سناء» دموعها وأكملت: سايباه بقالي سبع شهور لما ضربني بعصاية المقشة علقة موت لقيت إني مش قادرة اتحمل خلاص وقررت إني أهرب، من ساعة ما مشيت مسألش علي تاني واختفى ومعرفش طريق ملوش أي علاقة ببنته ومبيشوفهاش.
لازالت «سناء» تحاول تجاوز صدمة غدر زوجها بها وتحاول بناء حياتها هي وابنتها في منزل لهما بعيد عن كل العنف والقسوة التي عاشا فيها، ورفعت قضية خلع للتخلص من ذكرى حياة زوجية مريرة.