لما الدنيا لعبت معاه اتجوز عليا.. هناء في دعوى طلاق: بقاله 11 سنة مستغفلني
11 عاما من الخداع المتواصل من قبل الزوج وإقناع الزوجة أنه الرجل الوفي ولكن الكذب لم يدم طويلَا ولاحظت الزوجة تغير معاملته وطريقته معها في كل شئ ما جعلها تشك في الأمر وأنه على علاقة بأخرى لتكتشف خيانته بالفعل التي حاول إخفائها طوال 11 عاما فقررت الانفصال ورفع دعوى طلاق.
«اتجوزنا عن قصة حب كبيرة».. بهذه العبارة بدأت هناء تروي قصتها مؤكدة على علاقة الحب القوية التي نشأت بينهما منذ ، تابعت: «حبينا بعض وكنا صغيرين أوي وجالي اتقدم لي لكن أهلي رفضوا عشان أنا لسة صغيرة وهو كمان كان صغير ومكنش معاه شقة ومكنش بيشتغل لسه، بس أنا قلت مش مهم هنبدأ سوا ونكبر سوا ومفكرتش في حاجة غير إننا نكون مع بعض".
أضافت: وافق أهلي لما شافوا إن أنا بحبه ومصممة عليه واتجوزنا فعلَا وأهله جابوا له شقة كدا صغيرة وبدأ يشتغل مبيض محارة وكان مرتبه الأول قليل جدَا بس كنا بنمشي الدنيا، وهو كان بيحبني أوي وحنين معايا وأنا كنت مستحملة كل حاجة ومكنش فارق معايا غير إننا نكون مع بعض عشان كدا مكنتش بتكلم حتى لما مكنش بيبقى في فلوس ولا أكل مكنتش بعرف أهلي أي حاجة».
أكملت هناء: «وبعد كدا ربنا بدأ يفتح عليه ويكبر في شغله وبقى معاه فلوس كويسة وعمل أول شركة ليه ودخلنا العيال مدرسة خاصة كويسة وبقينا الحمدلله كويسين».
صدمة العمر
لم تدوم الحياة الوردية طويلَا وبدأت الزوجة تلاحظ تغيره في المعاملة وفي تصرفاته لم تهتم للأمر ولكن الموضوع ازداد عن الحد ما جعلها تشك في أمره، أضافت: «متجوزين بقالنا 20 سنة أول 9 سنين كان كويس معايا جدَا وكل الناس كانت بتحسدني عليه بس بعد كدا بدأ يتغير ومبقاش يحب يقعد في البيت وبقى يزعقلي وطول الوقت بيكرهني في نفسي ويقولي انتي شكلك بقى عامل كدا ليه إنت وحشة، كنت بقول يمكن مضغوط بس لقيت الموضوع زاد».
الزوجة تابعت: «بقى ينزلني أنا والعيال الساعة 12 بالليل ويقولي روحي عند أهلك أنا مش عارف أنام وكنت باخد العيال فعلَا وأروح وأقول اسيبه ينام براحته عشان يعرف يروح الشغل، كررها كتير وأنا بدأت أشك وكل اللي حواليا قالولي أكيد بيخونك».
أكملت هناء حديثها: «مسكت الموبايل وقلبت في الصور لقيت صورة واحدة وبدخل على الشات بينهم عرفت إنهم متجوزين بقالهم 11 سنة وإنها أكبر منه بـ 14 سنة، طلبت منه الطلاق قالي دي زميلتي لما لقاني مصممة على الطلاق قالي آه اتجوزتها عشان مبقتش بحبك».
تلقت هناء صدمة عمرها في زوجها التي قضت معه أكثر من نصف عمرها ولجأت لمحكمة الأسرة بالجيزة منذ 6 شهور ورفعت دعوى طلاق، ولا تزال القضية منظورة في المحكمة حتى الآن.