رامي عياله .. زوجة في دعوى نفقة: رايح يصرف كل فلوسه على الستات
تلجأ كثير من السيدات للانفصال للتخلص من حياتها البائسة، زوج سرعان ما يتحول لشخص أخر بعد الزواج، يتجه البعض منهم لطريق الإدمان والمخدرات، ومنهم من يهمل أولاده بلا سؤال أو مصاريف، فتظن بعض الزوجات أن الحال يتبدل بعد الانفصال ولكن يبقى الحال كما هو عليه بل ويتمادى في إهماله لأولاده، لذلك تلجأ الزوجة للقضاء ورفع دعوى نفقة من أجل الحصول على مصاريف لأولادها.
زوجة في دعوى نفقة : رايح يصرف كل فلوسه على الستات
"قاعد برا على طول" بهذه العبارة بدأت وفاء تروي معاناتها التي دامت لـ 8 سنوات مع زوجها الذي يهملها هي وأولادها، تابعت: "اتخطبنا 3 سنين وكان ملاك معايا ويجبلي هدايا ويعملي كل حاجة أنا عايزاها ومعاملته معايا كانت كويسة جدَا ومكنش بيزعلني طول فترة الخطوبة".
أضافت: "في أول الجواز كان كويس بس بقا مبيقعدش تقريبا خالص في البيت بالذات بعد ما بدأنا نخلف بقا علطول برا وكل ما أكلمه يقولي أنا مسافر في شغل، بقينا نتخانق كتير بسبب الموضوع دا وأقول هيصعب عليه ولاده بس برضو مفيش فايدة وبقا بيسافر زيادة عن الأول".
أكملت: "بيجلنا أنا والعيال كدا كل شهر يقعد معانا كام يوم ويمشي تاني غير كدا ميعرفش عننا وعن العيال أي حاجة وكل مرة يجيلي يسيبلي ألفين جنيه ويمشي وهو شغال في شركة سياحة ومعاه فلوس إنه يصرف علينا كويس أنا والعيال".
خيانة زوجية
بدأ الشك يأكل من قلب وفاء بسبب غياب الزوج لفترات طويله ما دفعها لتفتيش هاتفه وهنا كانت الصدمة إذ اكتشفت خيانة زوجها، تابعت: " بدأت اشك إنه يعرف ستات غيري وأخر مرة قررت إني افتش الموبايل وشوفت صوره وهو في سفريات مع ستات كتير، رايح يصرف على الستات وسايب عياله من غير مصاريف"
أضافت: "فهمني إنه بيسافر شغل وكل لما أكلمه أقوله شوف عيالك يقولي أنا بشتغل عشانهم وفي الأخر رايح يخوني بعد ما استحملت قرفه، طلبت منه الطلاق واطلقنا فعلًا"
انهت حديثها: "كنت فاكره إننا لما نتطلق هيهتم بعياله ويشوفهم ويصرف عليهم بس ولا أثرت فيه حاجة، بقى أسوأ وبيديني كل شهر 3 آلاف جنيه للعيال ولما قولتله زود المصاريف للعيال قالي اجبلك منين، لما عرفت إنه مش هيتغير رفعت دعوى نفقة عشان اعرف اصرف على عيالي"، ولا تزال القضية منظورة في المحكمة حتى الآن.
تابع أحدث الأخبار عبر
