أخبار محكمة الأسرة
«مكملناش 365 يوم وهرب».. رشا: بنتي 21 سنة ومتعرفش شكل أبوها
تواجدت «رشا» في محكمة الأسرة وهي تحمل الأسى والحزن على ما مرت به في حياتها من غدر زوجها بها وطردها في الشارع بعد وفاة والدها، لم تتوقع الزوجة عندما دخلت عش الزوجية أنها لن تكمل سنة في بيتها وحدث الطلاق واختفى الزوج من حياتها وحياة ابنتها كأنهم لم يتواجدوا في حياته يومًا.
قصص محكمة الأسرة.. سايبه جوزي من عمر بنتي
قالت «رشا» في بداية حديثها: «أنا متجوزاه من زمان معايا بنت في تانية جامعة منفصلة عن جوزي من عمر بنتي من 21 سنة، أنا وجوزي مكناش قرايب اتجوزنا جواز صالونات ومن يوم جوازي منه وأنا شايفة الويل والبهدلة كان بني آدم مش سوي وميتعاشرش».
دعاوي محكمة الأسرة.. اتطلقت وأنا حامل في بنتي
أكملت «رشا» حديثها وقالت: «بعد الجواز على طول اكتشفت إنه مدمن مخدرات، وقتها اتصدمت ومقدرتش أكمل معاه اتطلقت في نفس السنة اللي اتجوزنا فيها، ومن ساعة ما اتطلقت منه وهو اختفى ومعرفلوش طريق ومسألش في بنته اللي سبته وأنا حامل فيها».
حكايات محكمة الأسرة.. فص ملح وداب
تابعت حديثها قائلة: «بنتي معايا من ساعتها ومرجعناش تاني من ساعتها كان مبيصرفش خالص من ساعة ما انفصلنا ومنعرفش حاجة عن بعض مكنتش عايزة منه حاجة كفاية عليا بنتي بالدنيا، أنا بشتغل موظفة وبصرف عليها وهو فص ملح وداب معرفش طريقه حتى».
قضايا محكمة الأسرة.. عايشه في بيت والدي
أنهت «رشا» حديثها قائلة: «بالرغم من كل اللي عيشته في حياتي اللي جابني المحكمة كان عشان أرفع قضية إعلان وراثة أنا من ساعة طلاقي وعايشه في بيت والدي أنا وبنتي صاحب الشقة طردنا من البيت بعد وفاة والدي عشان استغل إن مفيش حد ليا في الدنيا بعده ولوحدي رفع قضية وأخد حكم بالطرد، وجيت المحكمة يمكن أعرف أخد حقي».
تابع أحدث الأخبار عبر
