أخبار محكمة الأسرة اليوم
سلمى لـ محكمة الأسرة: طلقنى بالتليفون وطردني في الشارع
دعوى نفقة كانت سبب تواجد «سلمى» في محكمة الأسرة التي تخلى عنها زوجها بعد خلاف بسيط حدث بينه وبين زوجته، وكان سبب تركه لها هو عدم رغبته في تحمل مسؤولية بيته وأسرته، وجعل أخيه يطردها من بيتها وسرقوا منها كل حقوقها، وبعد محاولات عديدة حاولت الزوجة أن تجد حل لمشكلتها مع زوجها ولكن فشلت كلها، توجهت لمحكمة الأسرة وهي تأمل أن تحصل على حقوقها وحقوق أبنائها الذي تخلى عنهم والدهم.
قصص محكمة الأسرة..جوزي كان عريس لقطة
قالت «سلمى» في بداية حديثها: «أنا متجوزة من 9 سنين، كان جواز عن طريق المعارف اتقدملي جوزي وكان كويس جدا ومحترم ومفيش منه مشاكل، وبيشتغل شغلانة كويسة وعريس لقطة وده اللي خلاني وافقت عليه».
دعاوي محكمة الأسرة..مشاكلنا زي أي بيت
أكملت «سلمى» حديثها وقالت: «بعد الجواز خلفت منه ولدين واحد عنده 4 سنين والتاني عنده سنتين، والدنيا في الأول كانت كويسة بس المشاكل كترت بعدين وكانت ليها أسباب كتير، بس كنا زي أي بيت خلافات عادية ومشاكل على المصاريف وأنا كنت بكبر دماغي وأعدي ومعملش مشاكل».
حكايات محكمة الأسرة.. بقاله 6 شهور سايبنا
تابعت «سلمى» حديثها قائلة: «لحد ما حصل بينا مشكلة مش كبيرة أوي وقتها جوزي والموضوع ده بقاله 6 شهور دلوقتي، وبعد ما ساب البيت عملي بلوك وطلقني على التليفون، واخوه استغل اني رحت عند أهلي وغير كالون الشقة، ولما حاولت أكلم أخوه قالي مليش دعوة وأنت ملكيش حاجة عندنا، ومن ساعتها وأنا لوحدي أنا وولادي ورحت قعدت عند أهلي ومش عارفة حتى أخد هدومي وحاجتي».
قضايا محكمة الأسرة..رامي ولاده ومش بيسأل فيهم
أنهت «سلمى» حديثها قائلة: «حاولت كتير أوصله واخليه يصرف أي حاجة على العيال لأن أنا مش بشتغل ومعنديش حد يصرف عليهم، لكن مفيش فايدة مصمم على اللي في دماغه ومش راضي يصرف ولا حتى يرجع يشوفهم ومعرفش طريقه فين، لحد لما ملقيتش حد يساعدني وقلت أجي محكمة الأسرة أرفع عليه قضايا نفقة عشان ولاده اللي مبيسألش فيهم دول وملهمش حد غيري ».
تابع أحدث الأخبار عبر
