أخبار محكمة الأسرة اليوم
بيضربها هو وأهله.. عايدة ترفع دعوى خلع ضد زوجها بمحكمة الأسرة
نهاية حزينة لم تتوقعها «عايدة» عندما وافقت على زواج ابنتها، إذ كانت تأمل أن تعيش ابنتها في راحة وسعادة مع زوجها، لكنها اضطرت إلى التوجه إلى محكمة الأسرة لرفع دعوى خلع ضد الزوج بسبب المأساة التي عاشتها ابنتها، والتعاسة التي تعيشها، فقد اعتاد سبها وإهانتهم، وعندما فاض الكيل بالفتاة اصطحبتها الأم إلى محكمة الأسرة للحصول على حريتها.
قصص محكمة الأسرة..اتطمنت على بنتي مع جوزها
قالت «عايدة» في بداية حديثها: «أنا جيت المحكمة مع بنتي عشان رافعة قضية خلع على جوزها، كان بقالها 4 سنين متجوزة وخلفت منه بنت، وسايباه بقالها كتير وقاعدة معايا من ساعة ما سابته، لما جوز بنتي اتقدملنا كان كويس وميبانش عليه حاجة وحشة هو أو أهله، سألنا عليهم وعرفنا إنهم ناس كويسين وظروفهم كويسة واتطمنت إن بنتي هتعيش مرتاحة معاهم بعد الجواز».
حكايات محكمة الأسرة..مشاكل بيت العيلة
تابعت «عايدة» حديثها قائلة: «بعد الجواز كانوا عايشين في بيت عايلة، بس ده العادي عندنا في بلدنا معظم البنات بتتجوز وتقعد في بيت عيلة جوزها، بس بنتي من ساعة جوازها وأهله متدخلين في كل حاجة حتى من ساعة الخطوبة، كانت بتعدي وتكبر دماغها عشان متعملش مشاكل، لكن بعد ما اتجوزت ودخلت بيتهم المشاكل زادت وبقت كتيرة عليها أنها تتحملها ».
دعاوي محكمة الأسرة.. بيضربها هو وأهله
أضافت الأم وهي حزينة على ابنتها: «جوز بنتي مكنش بيصرف عليها طول فترة جوازهم أمه وأهله هما اللي كانوا بيصرفوا وابنهم نايم في البيت، ولما بنتي متخدمش في البيت عندهم أو يحصل مشكلة ويتضايقوا منها ميصرفوش عليهم وتفضل جعانة مش لاقية الأكل، أهله كانوا سبب المشاكل الأول وبعد كدة بقى، هم كانوا عايزنها تشتغل خدامة عندهم وهي كانت بتخدم عشان متعملش مشاكل وياريته كان عاجبهم حاجة، هو كان بيضربها وأهله كانوا بيضربوها».
بنتي جابت أخرها من جوزها
أنهت «عايدة» حديثها قائلة: «لحد ما بنتي تعبت منهم وجت قعدت عندي، قالت إنها مش عايزاه ولا عايزة تكمل، حاولت اعقلها واخليها متخربش بيتها لأني مكنتش عارفة اللي بيعملوه معاها، لكن لما حكتلي وقالت إنها جابت أخرها ومش عايزة تكمل معاه بسبب عمايله هو وأهله وعايزة ترفع قضية خلع جيت معاها عشان أقف جنبها ».
تابع أحدث الأخبار عبر
