أخبار محكمة الأسرة اليوم
سهى تندب حظها: خد بنتي عشان يدخلها المدرسة ومشفتهاش من سنتين
لجأت «سهى» لـ محكمة الأسرة لاستعادة ابنتها من زوجها، واتهمته باختطاف الطفلة بحجة إدخالها المدرسة، لتمضي قرابة سنتين حرمها فيها من ابنتها.
قصص محكمة الأسرة
قالت «سهى» في بداية حديثها: «أنا اتجوزت 8 سنين وخلفت من جوزي بنت واحدة بس، وكان جواز صالونات ومن ساعة الخطوبة وفيه مشاكل معاه كان عصبي جدا وبتاع مشاكل، نصيبي اني اتجوزه، واتحملته كتير يمكن في يوم يتعدل ويكون كويس، لكن مفيش فايدة معاه خالص كان بني أدم صعب ميتعاشرش ».
دعاوي محكمة الأسرة.. سيبته بعد مشاكل كتير وخناقات
أكملت «سهى» حديثها وقالت: «لحد ما تعبت منه مكنتش قادرة اتحمله واتحمل عمايله، وخدت بنتي وسيبته ورحت اقعد عند أهلي بعد ما عيشت معاه أيام صعبة محدش يتحملها، القرار ده خدته بعد مشاكل كتيرة جدا وخناقات وتهديد بأنه يأذيني ويأذي بنتي، مكنتش عايشة معاه حياة طبيعية، وبعد ما سيبته حاول يرجعني مرتين مرة قالي نرجع وهيتعدل ومرة قالي نرجع عشان البن، وأنا مرضيتش اصدقه ولا ارجعله».
حكايات محكمة الأسرة..قلبي اتحرق على بنتي
تابعت «سهى» حديثها قائلة: «بعد ما سيبته واتطلقنا كان بيصرف علينا بس قليل جدا، وكنت بخليه يشوف البنت عادي ومش حرماه منها، ومن سنتين خدها عشان يدخلها المدرسة ومن ساعتها مرجعهاش تاني ولحد انهارده مشوفتهاش ولا كنت عارفه اوصلها، دورت عليهم في كل حته وسألت كل الناس عليه بس ملقتهمش، اتحرق قلبي عليها وأنا مش عارفة مكانها».
قضايا محكمة الأسرة..بيعذبوا بنتي
أنهت «سهى» حديثها قائلة: «لحد من أسبوع بس بالصدفة عرفت مكانهم، وعرفت أكلمها وعرفت ان طليقي وحماتى وحمايا بيعذبوها وبيضربوها ودخلوها مدرسة حكومي عشان معرفش أوصلها، ومش بيجيبولها لبس ولا بتاخد مصروف زي العيال، لما كلمتها قالتلي الحقينى ومش عايزة أعيش معاه وخديني، وانا وعدتها انى هاخدها وجيت المحكمة عشان أرفع قضية حضانة وأرجعها».
تابع أحدث الأخبار عبر
