أخبار محكمة الأسرة اليوم
همسة لـ محكمة الأسرة : كتب كل حاجة باسم أخوه عشان يبان غلبان ومش لاقي
رفعت «همسة» دعوى نفقة في محكمة الأسرة على زوجها الذي لم يصرف عليها ماتحتاجه هي وأبنائها طوال فترة زواجهم، وبعد تحمل الزوجة له لسنين عديدة كان جزائها في النهاية هربه منها ومن بيتهم وتركها تتوجه لمحكمة الأسرة حتى تحصل على حقوقها المادية التي حرمها منها عن طريق دعوى نفقة في محكمة الأسرة.
قصص محكمة الأسرة.. أعرف جوزي من ساعة المدرسة
قالت «همسة» في بداية حديثها: «أنا متجوزة من 2015 خلفت من جوزي ولد وبنت، أنا وهو كنا جيران اتعرفنا على بعض من واحنا في المدرسة وحبينا بعض من زمان واتجوزنا والدنيا كانت كويسة في أول كام سنة جواز كان محترم وكويس ومكنتش أتوقع إنه يعمل معايا اللي عمله ده ».
دعاوي محكمة الأسرة..مبيصرفش حتى لو معاه فلوس
أكملت «همسة» حديثها وقالت: «كان مشاكلي معاه في الأول إنه مبيصرف خالص، ولو صرف بيكون على القد، الأول كنت صبر عليه وأقول ظروفه صعبة ولسه بيبدأ حياته لكن حتى لما كان بيبقى معاه فلوس كان مبيصرفش اللي يكفينا أبدا وأنا اتحملت كل ده زمان اهلي كانوا بيساعدوني وهو بيجيب حجات شكلية في البيت بس ».
حكايات محكمة الأسرة.. ساب البيت عشان ميصرفش
تابعت «همسة» حديثها قائلة: «لما ربنا كرمه بشغلانة كويسة وبقى معاه فلوس اللي بدل ما يصرف على بيته وأولاده، قرر أنه يسيب البيت وراح قعد في شقة تانية لوحده وسابني من غير فلوس وقتها اضطريت أبيع الدبلة والحلق بتوعي عشان أصرف على ولادي ولما عرفت أوصله طلبت منه يرجع ويصرف رفض، وهددته أرفع قضية نفقة قالي اعملي اللي انتي عايزاه، ولما رفعت عليه قضية النفقة قال مش هتعرفي تثبتي عليا حاجة ».
قضايا محكمة الأسرة..اتحكملي بنفقة ملاليم
أنهت «همسة» حديثها قائلة: «كان فيه شقتين بتوعه وعربية كتبهم كلهم باسم اخوه وبقى قدام المحكمة معهوش جنيه وموظف غلبان شغال شغل حكومة والنفقة اللي اتحكملي بيها كانت ملاليم، واخرتها قالي اتنازلي عن قضايا النفقة وأنا ارجع البيت بس أنا اللي مش عايزة ارجعله تاني بعد اللي شفته منه».
تابع أحدث الأخبار عبر
