ندى تطالب بنفقة لطفلتيها: "جوزي طفش وراح قعد عند أمه"
لجأت «ندى» لرفع دعوى نفقة على زوجها، الذي رضخ لضغوط أهله وترك بيته وأولاده وهدم أسرته بيده، لتجد نفسها مجبرة في النهاية على التوجه لـمحكمة الأسرة لتحصل على حقوقها.
قصص محكمة الأسرة.. كنت فاكرة هعرف اعيش مبسوطة في بيت العيلة
قالت «ندى» في بداية حديثها: «أنا اتجوزت من 8 سنين في بيت عيلة وخلفت بنتين، أنا وجوزي مكناش قرايب لما اتقدملي قالي مش هيقدر يجيب شقة برة بيت أهله وأنا وافقت اني أعيش في بيتهم، وقلت هبقى في حالي ومليش دعوة بحد ومش هيحصل مشاكل لكني كنت غلطانة».
دعاوي محكمة الأسرة.. متبهدلة مع أهل جوزي من زمان
أكملت «ندى» حديثها وقالت: «من ساعة ما اتجوزت وأنا في مشاكل مع أهل جوزي، كانوا على طول شتيمة وإهانة كتير بسبب ومن غير، بخدمهم وفي الآخر بتبهدل واتشتم وكنت بعدي واستحمل وأقول معلش لكن مفيش فايدة كانوا مبهدلني ومفيش حاجة عجباهم أبدا، وهو مكنش بيقدر يقف قصاد أهله أو يقولهم حاجة».
حكايات محكمة الأسرة.. ساب البيت وراح عند أمه
تابعت «ندى» حديثها قائلة: «بعد فترة طلبت منه إننا نسيب البيت ونعزل بعد ما بقت الحياة معاهم لا تحتمل كانوا بيكرهوني ومعاملتهم معايا وحشة جدا، وافق وقتها إننا نعزل ورحنا قعدنا في شقة إيجار وفضلنا سنتين عايشين كويسين واحنا بعيد عنهم، لحد في آخر فترة فضلوا يقوموه علينا إنه يسيب البيت ويمشي ويسبني أنا والبنات وميسألش فينا، وفعلا سابنا وراح قعد عند أمه بعد ما عمل مشكلة كبيرة على حاجة تافهة».
قضايا محكمة الأسرة.. عايزني أرجع للعذاب تاني
أنهت «ندى» حديثها قائلة: «حاولت معاه كتير إنه يرجع وهو رافض قالي مش هيرجع لو عايزة نرجع أروح أقعد عند أهله تاني وده مش هيحصل مقدرش ارجع للبهدلة تاني، ولما لقيت مفيش فايدة معاه جيت ارفع قضية نفقة عشان أخد حقوقي منه، لأنه مش بيسأل فينا ولا ليه دعوة بينا خالص».
تابع أحدث الأخبار عبر
