أخبار محكمة الأسرة اليوم
سهيلة لقاضي الأسرة: "وقفت جنبه وفي الأخر اكتشفت انه بيعرف عليه ستات"
رفعت «سهيلة» دعوى خلع في محكمة الأسرة ضد زوجها، الذي تحدت أهلها بسبب رفضهم إياه لوجود فارق مادي كبير بينهما، وقالت الشاكية لقاضي الأسرة، أنها طوال فترة زواجهما التي دامت لسنين عديدة وقفت بجانبه لبناء أسرة سعيدة، وفي النهاية اكتشفت أن من اختارته أن يكون شريك حياتها خائن، لذا توجهت بدعوى لمحكمة الأسرة لتلحق ما بقي من عمرها.
قصص محكمة الأسرة..اتحديت أهلي واتجوزته
وقالت «سهيلة» في بداية حديثها: «أنا اتجوزت من 12 سنة ومخلفة ولد وبنت، اتعرفت عليه عن طريق ناس صحابي، واتقدملي بعد قصة حب، أهلي كانوا رافضين جوازنا عشان الفرق في المستوي المادي بينا وبينه، لكن أنا وقفت قصادهم وقلتلهم لازم اتجوزه، ومشينا بمبدئ خدوهم فقراء يغنيهم الله، طلع الفقيرفقير النفس مش الفلوس ».
دعاوي محكمة الأسرة..أنا اللي بصرف على البيت والولاد
أكملت «سهيلة» حديثها وقالت: «جوزي طلع نصاب وكذاب، طول حياتي معاه كانت كذبة كبيرة وأنا معرفش، في الأول كان طول الوقت بيشتكي من المصاريف وإنه مش معاه فلوس، وأنا كنت بساعده وأقف جنبه عشان عارفة ظروفه، كنت أنا اللي كنت بصرف من ورث أمي على البيت وعلى الولاد، ولما أمي كانت عايشة كانت بتبعتلي عشان مكونش محتاجة حاجة أنا وولادي، اتحملت إني أكون محتاجة حاجات ومقدرش أجيبها بسبب ظروفه الصعبة».
حكايات محكمة الأسرة.. بني أدم مش متزن
تابعت «سهيلة» حديثها قائلة: «لحد من سنتين تقريبا اكتشفت إنه بيخوني، طلع عنده فيسبوك سري وبيكلم عليه ستات كتيرة جدا وأنا كل ده معرفش، بيكلم ستات مصريين وأجانب ، وبيخرح معاهم ويجيبلهم هدايا كل ده من وراي مضيع فلوسه على الستات وأنا اللي بصرف، طول فترة جوازي هو مكنش متزن كان شوية مستقر وشوية لا لما يبقى متعرف على واحدة جديدة يبقى عصبي ويتخانق معايا وعايز يقضي وقت بره البيت ولما علاقته بيها تفشل يرجع كويس تاني».
قضايا محكمة الأسرة
أنهت «سهيلة» حديثها قائلة: «لما عرفت كدة سيبته ومرضيتش أرجعله تاني، ولما رفضت أرجعله بقى يشك فيه ويمشي ناس ورايا وعايز يلبسني قضية زنا، بيخلي رجالة يكلموني في التليفون عشان لما نطلق ماخدش حاجة، لما فهمت إنه مسلطهم بقيت مردش عليهم أصل مين غيره هيعمل كدة أنا معرفش غير 5 صحابي ستات بس وأهله حتى مليش علاقة بيهم، ودلوقتي رافعة عليه قضايا نفقة عشان ولادي، ورفعت قضية خلع ليا».
تابع أحدث الأخبار عبر
