أخبار محكمة الأسرة اليوم
سلوى لـ محكمة الأسرة : عايزة أشوف حياتي زي ما هو شاف حياته
كانت سلوى في محكمة الأسرة تبحث عن حقها من زوجها الذي لم يصونها أو يقدرها وتركها دون سؤال أو رعاية، وبعد محاولات الزوجة العديدة في أن يعود الزوج لبيته وأسرته توجهت الزوجة لمحكمة الأسرة ورفعت دعوى خلع لتحصل على حريتها التي منعها زوجها عنها مثلما منعها من الحصول على حلم البيت والأسرة المستقلة.
قصص محكمة الأسرة.. مكنتش أعرف جوزي قبل الجواز
بدأت «سلوى» حديثها: «أنا اتجوزت من 3 سنين، أنا وجوزي مكناش نعرف بعض قبل الجواز، اتجوزنا جواز صالونات على طول، في الأول كل حاجة كانت كويسة ومفيش مشاكل وعيشنا مع بعض والدنيا كانت ماشية سنة وشهرين بس في بيتنا ومن ساعتها كل حاجة اتغيرت».
حكايات محكمة الأسرة..باعتني عند أهلي وهو عايش حياته
تابعت «سلوى» حديثها قائلة: «الحياة في الأول مع جوزي كانت طبيعية ومفيش مشاكل، لكن بعد سنة بس جوزي بعتني عند أهلي بحجة إنه مشغول في الشغل والبيت فاضي معظم الوقت ومينفعش أقعد لوحدي ، بعد كدة قالي إن معهوش يدفع فلوس الايجار وهنطرد من الشقة واكتشفت إنه كل كلامه كدب وهو باعتني عند أهلي بس عشان يعيش حياته، حاولت معاه كتير إني أرجع وأعيش معاه ونفضل سوا لكن مفي فايدة».
دعاوي محكمة الأسرة.. جوزي بيجي يشوفني زي الضيف
أضافت الزوجة: «جوزي كان بيجيلي في بيت أهلي كل شهر أو شهرين زي الضيوف، أخر مرة شفته كان من سنة تقريبا، بس كان بيكلمني وكنت عارفة هو فين وكان بيبعتلي مصروف، بس من 6 شهور اختفى ومعرفلوش طريق ومبقاش يبعت أي مصاريف، كلمته كتير عشان أعرف هو فين ومفيش فايدة ولا أعرفله طريق ولا حد راضي يقولي هو فين».
قضايا محكمة الأسرة.. عايزة أشوف حياتي زي ما هو شاف حياته
أنهت «سلوى» حديثها قائلة: «أهله كانوا عارفين مكانه بس محدش رضي يقولي، ومرضيوش حتى يخلوه يطلقني واخره ما تعبت منه ومن الحياة دي جيت عشان أرفع قضية خلع عشان أخلص منه أنا اتجوزت زي كأني متجوزتش بالظبط ملحقتش أفرح زي باقي البنات، ودلوقتي عايزة أشوف حياتي زي ماهو شاف حياته ورماني ومسألش فيا ولا وقف جنبي».
تابع أحدث الأخبار عبر
