أخبار محكمة الأسرة اليوم
دعاوى محكمة الأسرة.. هناء: مقدرش ينسى الحب القديم خلاني أسكن جنبه
تواجدت “هناء” في محكمة الأسرة بعد خيانة زوجها لها الذي لم يقدر على أن ينسى حب حياته حتى بعد زواجه وانشائه لأسرة، تزوجت هناء في بيت عائلة ولم تعلم عند زواجها أن زوجها كان على علاقة بجارتهم منذ سنين عديدة وإصراره على أن يسكنوا في بيت العائلة كان فقط ليبقى قريب من حبه القديم.
وعندما اكتشفت الزوجة أن زوجها مازال على علاقة بجارته واجهته وطلبت العون من أهله لكن ما وجدته هو القسوة عليها وعلى أطفالها حتى وصلت لأعتاب محكمة الأسرة لتجد حل لمشكلتها مع زوجها.
قصص محكمة الأسرة.. وافقت اتجوز في بيت عيلة عشان جوزي
قالت «هناء» في بداية حديثها: «أنا اتجوزت من 8 سنين كان جواز صالونات اتجوزت وخلفت من جوزي ولد وبنت، لما جوزي اتقدملي صمم إننا نعيش في بيت العيلة لأنه عنده شقة فيها ولما طلبت منه إننا نسكن بره رفض وقالي أنا مينفعش أسيب أهلي وافقت ساعتها بالذات عشان أهله ناس كويسة ومفيش منهم مشاكل».
حكايات محكمة الأسرة.. أهلي كانوا بيساعدوني في مصاريف البيت
تابعت «هناء» حديثها قائلة: «لما اتجوزنا في الأول الحياة بينا كانت كويسة ومفيش مشاكل، وحتى المشاكل اللي كانت بتبقى على بسبب المصاريف كان مبيصرفش علينا غير قليل ميكفيش حتى أننا نعيش حياة متوسطة بس كنت بعدي وأمشي الدنيا وأهلي كانوا بيساعدوني».
دعاوي محكمة الأسرة.. جوزي بيخوني مع جارتنا
أضافت الزوجة: «بعد جوازي بفترة عرفت إن جوزي كان على علاقة بواحدة جارته قبل ما نتجوز وبقالهم سنين وموقفتش حتى بعد ما اتجوزنا، وكان هو ده السبب إنه صمم نعيش في بيت العيلة، وبعد كده اكتشفت إنه لسه على علاقة بيها لما لقيتها رجعت حياته وبقت تيجي وتسلم عليا في البيت كأنها تعرفني».
قضايا محكمة الأسرة.. مبيسألش فيا أنا وعياله
أنهت «هناء» حديثها قائلة: «لما ابتدت تظهر في حياته عرفت إنه لسه على علاقة بيها كنت بشوف جوزي بيخرج معاها ولما واجهته وقلتله مينفعش اللي بيعمله ده قالي ده اللي عندي وأنا مش هسيبها، ولما اشتكيت لأهله قالوا ده راجل ومفيش حاجة في أيدينا نعملها، لحد ما سيبته ورفعت قضية نفقة وقضية بالقايمة لإنه مبيصرفش علينا سايبنا و مبيسألش ».
تابع أحدث الأخبار عبر
