أخبار محكمة الأسرة
محكمة الأسرة .. عزة: اتجوزت في شهر 2 ورجعت لأبويا في شهر 3
كانت محكمة الأسرة هي المكان الذي تواجدت فيه «عزة» بسبب زواج لم يدم سوى شهر فقط وانتهى بسبب قسوة زوجها وأهله عليها وتحكمهم في حياتها، حاولت «عزة» أن تحافظ على بيتها لكن كان زوجها وأهله أقوى منها وجعلوها تهرب من ظلمهم وتتوجه لمحكمة الأسرة لتبحث عن حقوقها وحريتها التي حرموها منها طوال حياتها معهم وجعلوها تعيش في إهانة وظلم في فترة زواجها القصيرة.
قصص محكمة الأسرة.. رجعت لأبويا بعد شهر جواز
قالت «عزة» في بداية حديثها: «أنا اتجوزت من ١٠ شهور قعدت مع جوزي شهرين بس ومجبتش أولاد، اتجوزت شهر 2 رجعت لأبويا شهر3، اتعرفت على جوزي كنا شاغلين في مكان واحد واتعرفنا على بعض منه، لما اتخطبنا كان مفيش مشاكل والدنيا كويسة بس من أول الجواز المشاكل كلها بانت.»
حكايات محكمة الأسرة.. وشه الحقيقي بان بعد الجواز
أكملت «عزة» كلامها وقالت: «هو كان متجوز قبل كدة واحدة تانية وقعد معاها شهر بس واتطلقت منه، أنا كنت عارفة انه كان متجوز بس وقتها فهمني إنه طلقها لأن الغلط من عندها أنها مكنتش عايزة تعيش ومش عاجبها حاجة عشان كدة طلقها لكن بعد ما اتجوزته الوش الحقيقي ظهر وطلع بيكدب عليا في كل حاجة قالها.»
دعاوي محكمة الأسرة.. من أول أسبوع عند أهله
أضافت «عزة»: «من ساعة ما اتجوزته وهو عايزني اقعد عند اهله على طول ومعدش في شقتي، من أول أسبوع جواز وأنا في بيتهم، وبقى حابسني عند أهله ومش راضي يخليني أقعد في شقتي خالص، بقى مصاريفه كلها عند أهله ومبيدينيش جنية، بقى حتى عفشي عند أهله وبيستخدموه قبل ما استخدمه أنا.»
قضايا محكمة الأسرة.. بتضرب من أول يوم جواز
أنهت الزوجة حديثها: «شفت البهدلة والإهانة معاه، من أول يوم جواز بتضرب وبتهزق بسبب ومن غير سبب، واتحملت عشان مخربش بيتي لكن تعبت منهم ولقيت مفيش فايدة، لما طلبت منه الطلاق رفض وقالي هسيبك كدة متعلقة وسايباه من ٨ شهور، حاجتي كلها عندهم في بيتهم مخدتش حاجة خرجت بهدومي بس، اتطلقت منه بقضية خلع ورفعت دلوقتي عليه قضية نفقة وتمكين.»
تابع أحدث الأخبار عبر
