أخبار محكمة الأسرة
محكمة الأسرة.. سحر: عايشين مع همجي بنتي الكبيرة بيضربها بالحزام والصغيرة بتتسحل
توجهت «سحر» إلى محكمة الأسرة حتى تنهي العذاب الذي عاشته في حياتها الزوجية الذي كان سببه زوجها الذي اتسم طبعه بالقسوة على زوجته وعلى بناته، بدلًا من أن يكون سند وضهر لهن في الدنيا كان هو سبب خوفهم ومصدر الألم في حياتهن، بسبب ضربه وإهانته لهم طوال الوقت، حتى قرر طردهم من بيتهم وحياته، وترك زوجته تتوجه لمحكمة الأسرة حتى تحصل على حقوقها منه.
قضايا محكمة الأسرة
بدأت «سحر» حديثها وقالت: «أنا اتجوزت في نهاية 2015 واتطلقت عن طريق قضية طلاق شقاق، خلفت من جوزي بنتين، في الأول كان كويس ومفيش مشاكل، كنا زي أي اتنين متجوزين، بس دلوقتي اللي فكراه إن طول حياتي معاه مد إيد وشتيمة بألفاظ مش كويسة كان طبيعته غير أدمية وبني أدم صعب التعامل معاه».
قصص محكمة الأسرة
أكملت «سحر» حديثها عن معانتها مع زوجها وقالت: «اتحملت بهدلته سنين عشان بناتي يتربوا مع ابوهم، بس الحياة معاه كانت صعبة جدًا كان نفسيًا شخص مش سوي، بيمسك بنتي الصغير يسحلها على الأرض وهي عندها 6 سنين وبنتي الكبيرة بيضربها بالحزام وبيضربني أنا كل شوية، لحد أخر مشكلة حصلت طردني من البيت وغير كالون الشقة وبعدها عمل انذار طاعة عشان يسقط من عليا كل حقوقي».
حكايات محكمة الأسرة
تابعت «سحر»: «بعد ما طردني رفعت تمكين عشان أخد الشقة وعقبال ما نفذته خد شهرين، لما دخلت البيت لقيته على البلاط، خد كل حاجتي وبيساومني حاجة قصاد حاجة وبيقولي مش هيديني حاجتي كاملة، ورافض إني اجيب شقة جنب أهلي عشان محدش يساعدني منهم، الضرر النفسي اللي حصلي في حياتي بسببه كان ضرره أكتر من الضرب.»
دعاوي محكمة الأسرة
أنهت «سحر» حديثها وهي متأثرة وقالت: «حاولت أخلص الموضوع بشكل ودي عشان الأولاد اللي بينا، لكن هو عايز يإما أعمل اللي هو عايزة يا يبهدلني في المحكمة، بلف عشان أخد حقي ومنقولاتي، ورفعت قضية رد منقولات لأني اتجوزت من غير قايمة، رفعت عليه قضية طلاق شقاق وكسبت ومن بعد الطلاق رفعت قضية نفقة، ورامي بناته ومبيسألش عليهم.»
تابع أحدث الأخبار عبر
