«عشيقته سرقت عفشي».. مديحة في دعوى خلع: نزواته دمرت بيتي ومستقبل ولادي
عاشت «مديحة» مع زوجها متحملة خيانته لها؛ على أمل أن يتغير في يوم من الأيام، لكن لم يتغير زوجها وترك نفسه لعلاقاته النسائية المتعددة التي دمرت أسرته وجعلتها تلجأ لـمحكمة الأسرة طالبة الخلع.
مديحة في دعوى خلع: نزواته دمرت بيتي ومستقبل ولادي
تزوجت «مديحة» زواج صالونات ومنذ وقتها عاشت حياة مع الزوج ملأتها الخيانة والألم والضرب والإهانة، وحاولت لسنين عديدة أن تتجاهل خيانته لكن زوجها زاد في خيانته وعدم صرفه أموال عليها أو على أولادهم، وعندما واجهته بأفعاله طردها وتركها وحدها دون سند أو ضهر في الدنيا وفي النهاية ترك عشيقته تسرق حقها وعفشها، وجعل زوجته تتوجه لمحكمة الأسرة حتى تحصل على حقوقها الذي حرمها منها.
جواز صالونات
قالت مديحة: «أنا اتجوزت من 8 سنين كان جواز صالونات وخلفت من جوزي عيلين، ومن أول جوازنا وهو بيخوني بيعرف عليا ستات كتير من زمان، وكنت دايما بطنش وبكبر دماغي وأعمل نفسي مش شايفة خيانته عشان أمشي الدنيا ومخربش البيت».
مبيصرفش على بيته ولا أولاده
تابعت مديحة: «كل مادى كان بيزيد في الخيانة، كان أي ست يشوفها تعجبه ويكلمها في التليفون وكنت بشوفه بيتكلم فيه واعرف انه بيكلم واحدة تانية، مكنش بيصرف وبيسيب البيت فاضي من غير أكل ولا شرب، وكل لما اكلمه يقولي معيش واجبلك منين،مرتبه معرفش بيضيع في ايه».
جوزي بيضربني ويبهدلني
أكملت مديحة: «حياتي معاه كلها كانت ضرب وشتيمة واهانة، وامي اللي كانت بتصرف علينا، لحد في 2020 ضربني وطردني وخد مني العيال، عشان بقوله عيب اللي بيعمله ده، وطلبت منه مصاريف للبيت»
عشيقته سرقت عفشي
أضافت مديحة: «خدت منه العيال بعد ما سيبت البيت، ولما الأهل حاولوا يصالحونا على بعض رفض، استغل أنى مشيت وجاب واحدة البيت وانا مش موجودة كانت بتشتغل معاه وكان على علاقة بيها ، سرقت كل عفشي وخدته سابت الحاجات الصغيرة بس، جابت عربية بليل ولمت حاجتي وفضت البيت»
دعوى في محكمة الأسرة
أنهت مديحة حديثها: «رفعت قضية بالقايمة، لما جيت استلم حاجتي لقيت جايبين عفش بايظ مش بتاعي، ورفعت قضية خلع لأنه رفض يطلقني ومش عايز يديني أي حاجة من حقي حتى العيال».
تابع أحدث الأخبار عبر
