بهية في دعوى تمكين: رافعة القضية بالعند فيه عشان هيتجوز في شقتي
اضطرت «بهية» أن تواجه قسوة قلب زوجها عليها وعلى أبنائها عن طريق محكمة الأسرة، فكانت ملجأها الأخير حتى تجد حل لمشكلاتها وتحصل على حقوقها.
تزوجت «بهية» وكانت الخلافات الزوجية هي عنوان حياتها فكان زوجها رجل عصبي وقاسي القلب فكان يعذبها ويهينها هي وأبنائهم وصبرت الزوجة عليه لسنين عديدة حتى لا تخرب بيتها ولا يتشرد أطفالها، وبالرغم من صبرها عليه كان الزوج هو من طردها هي وابنائهم ولم يعطها أي من حقوقها هي وابنائهم، وحصلت على جميع حقوقها عن طريق المحاكم فلم يترك زوجها للود أي مكان بينهم.
زواج صالونات
قالت بهية: «أنا اتجوزت من 11 سنة خلفت من جوزي 3 أولاد، كان جواز صالونات اتقدملي وسألنا عليه وسمعنا عنه كلام كويس وعلى أساس الكلام ده وافقت عليه، وكنت فاكرة أنه هتجوز واعيش حياة عادية بس كنت غلطانة.»
جوزي راجل عصبي
تابعت بهية: «مشاكلي معاه كلها أنه كان مبيصرفش علينا غير على القد بس كان ممكن اتحمل المصاريف القليلة لكن اللي مكنتش قادرة اتحمله انه راجل عصبي جدا كل شوية يعمل مشكلة بسبب أو من غير سبب في كل خناقة كان شتيمة وضرب وإهانة، كنت بصبر عليه عشان خاطر مينفعش اسيبه وأطلق عشان العيال ميتبهدلوش ومخربش البيت.»
طردني من البيت أنا والعيال
أكملت بهية: «لحد في مرة حصلت مشكلة بيني وبين جوزي مش فاكرة حتى سبب المشكلة، ساعتها ضربني زي كل مرة بس بعدها طردني وصمم إني مقعدش في البيت أنا والعيال، وسابني رحت عند أهلي اقعد عندهم ومن ساعتها مسألش فينا.»
دعاوي في محكمة الأسرة
أضافت بهية: «من ساعة ماسيبته وأنا متبهدلة في المحاكم لأنه مبيصرفش ولا بيسأل فيا أنا والعيال من ساعة ما مشينا، الأول رفعت خلع واتطلقت منه لأنه رفض الطلاق ودي، بعد كدة رفعت عليه قضية نفقة عشان حق ولادي اللي مبيصرفش عليهم، واخرتها لما عرفت إنه عايز يتجوز في الشقة بتاعتنا رفعت دعوى تمكين عشان ألاقي مكان أعد فيه أنا وولادي بدل مانا قاعدة عند أهلي طول السنين دي. أنا رافعة قضية التمكين عند عشان أنا متبهدلة وهو رايح يتجوز. »
تابع أحدث الأخبار عبر
