«طردوني من البيت».. رجاء في محكمة الأسرة: بهدلني وهو عايش وأهله بهدلوني لما مات
«رجاء» سيدة قوية تحملت زوجها وطباعه الصعبة من أجل أبنائها وبعد وفاته مازالت تقف صامدة تحاول أن تحصل على حقوق أبنائها وتكون سند وضهر لهم في الدنيا بعد ما قسى عليهم أقاربهم وسرقوا حقهم.
تزوجت «رجاء» منذ 23 عامًا وكان زوجها رجل طباعه صعبة ولا تحتمل كان يقسو عليها وعلى أولاده ولم ترى معه أيام يملأها الفرحة لكنها تحملته من أجل أولادها وحتى لا تخرب بيتها، عندما توفى زوجها رغم معاملته الصعبة لها شعرت بالحزن على سنين العشره التي عاشتها معه بعد وفاته، وعندما كانت حزينة على وفاة زوجها وجدت نفسها في مواجهة أهل زوجها وحدها فلم يكفيهم الأيام الصعبة التي عاشتها مع زوجها عندما كان على قيد الحياة فجعلوا حياتها جحيم بعد وفاته وطردوها هي وابنائها وأخذوا حقها حتى جعلوها تلجأ في النهاية لمحكمة الأسرة حتى تحصل على حقوق أولادها اليتامى.
جوزي عصبي
قالت «رجاء»: اتجوزت من 23 سنة جوزي شافني زمان واتقدملي ووافقت عليه عشان كان مناسب خلفت منه وكنا عايشين في بيت عائلة كان في مشاكل زي أي بيت عائلة وفوقها كان في مشاكل مع جوزي كان عصبي وبيعمل مشاكل معايا على أي حاجة ومن غير أي سبب.
جوزي مات في حادثة عربية
تابعت «رجاء»: اتحملت عصبية جوزي عشان مخربش بيتي وعيشت معاه والدنيا كانت ماشية لحد بعد وفاة حماتي بـ ٤٠ يوم جوزي خبطته عربية و مات، بالرغم من المشاكل اللي بينا زعلت عليه لما مات هو لسه أبو عيالي برضو وعشرة عمر.
أهله طردوني بعد وفاته من بيت العائلة
أضافت «رجاء»: بعد وفاة جوزي ولادي ملهمش غيري ولسه مفقش من اللي حصل لقيت أهل جوزي طردوني من البيت اللي كنا عايشين فيه وقالولي مليش حاجة عندهم، وكان لينا ورث بتاع جوزي وخدوه ومدونيش أنا وولادي أي جنية.
دعوى إعلام وراثة
أنهت «رجاء» كلامها: جيت محكمة الأسرة عشان ارفع قضية إعلام وراثة وأخد حق ولادي اللي ملهمش غيري في الدنيا وأهلهم كلوا حقهم ومبيسألوش فيهم من ساعة وفاة ابوهم بدل ما يقفوا جنبهم
تابع أحدث الأخبار عبر
