"عايشة على البلاط بسببه".. نهلة للقاضي: " معاه فلوس ومش عايز يوسعها علينا"
13 عام عاشتهم «نهلة» مع زوجها وحاولت طوال هذه السنين أن تؤمن مستقبلها ومستقبل أولادها ولكن فشلت كل محاولاتها وهزمها بخل وقسوة زوجها عليها وعلى أولادهم.
توجهت «نهلة» لمحكمة الأسرة بسبب أن طوال سنين زواجها كان زوجها يبخل عليها وعلى أولادهم ولم يريد أن ينقل زوجته وأولاده لمكان أفضل في منطقة أفضل بدلا من المكان الذي كانوا فيه الذي لم يكن مناسب ولا يكفيها ويكفي أبنائهم بعد الأن، وبعد محاولات عديدة حاولت الزوجة أن تحافظ على أسرتها وتشتري مكان لمستقبلها ومستقبل أولادها، لكن أفعال زوجها أوصلتها لمحكمة الأسرة حتى تحصل على حقها في النفقة الذي ضمنها لها القانون.
6 سنين قضايا في المحكمة
قالت «نهلة»: انا اتجوزت من 13 سنة خلفت من جوزي 3 أولاد واتطلقت من 3 سنين، رافعة القضايا على جوزي من 6 سنين من قبل حتى الطلاق، أنا وجوزي سايبين بعض من 3 سنين والـ 3 سنين اللي قبلهم كان كلهم ضغط ومشاكل بسبب المصاريف وموضوع إني عايزة انقل.
مش عايز يوسع علينا ونروح مكان أحسن
تابعت «نهلة»: من ساعة ما اتجوزت كنا عايشين في شقة صغيرة اوضتين ومدخل وفي منطقة مش كويسة، جوزي في الأول كانت الفلوس اللي معاه على قده وانا وقفت معاه من وهو معهوش فلوس لحد ما بقى مرتبه عالي بقى مقتدر ومعاه فلوس ومكنش راضي يخلينا نعزل نروح شقة أحسن.
بدخل جمعيات واحوش عشان اجيب شقة
أضافت «نهلة»: اتحايلت عليه اننا نعزل ونروح مكان تاني وكان كل مرة بيرفض، فضلت أنا من وراه أحوش ودخلت جمعيات وشيلت الفلوس كلها معايا عملت كدة عشان يبقى معانا فلوس كفاية نعزل، لما الفلوس كترت ووصلت لمبلغ محترم مكنش مبلغ كبير أوي ويجيب حاجة، بس ربنا كرمني بمكان وصاحب العمارة استني عليا في الفلوس وجبت شقة طوب أحمر رحت وكتبت العقد وكنت بحاول اوضب الشقةمن ورا جوزي، كل ده مكنش يعرف لو عرف كان عمل معايا مشكلة.
دعاوي نفقة في محكمة الأسرة
أنهت «نهلة» كلامها: لحد ما جوزي عرف بالشقة لما شاف العقد، عمل معايا مشكلة كبيرة وسيبت البيت ساعتها ورفعت عليه قضايا نفقة لأنه مكنش بيسأل فينا لما مشيت، مكنتش عايزة اتطلق عشان النفقة بتاعتي متقفش هو اللي طلقني عشان مخدش نفقة الزوجية، دلوقتي أنا رافعة عليه قضايا نفقة للعيال وعايشة في الشقة على الطوب الأحمر.
تابع أحدث الأخبار عبر
