سعاد في دعوى خلع: «كان عايش على قفا أمه ودلوقتي عايش على قفايا»
بعد 20 عامًا من الزواج كانت محكمة الأسرة هي المحطة الأخيرة التي وصلت لها «سعاد» لترفع دعوى خلع على زوجها للتخلص منه وتحصل على حريتها وتنسى سنين الالم التي عاشتها معه.
سعاد في دعوى خلع: كان عايش على قفا أمه ودلوقتي عايش على قفايا
عاشت «سعاد» سنين مع زوجها الذي رفض تحمل المسؤولية أو يصرف عليها وعلى أبنائهم طوال هذه السنين لكنها صبرت على حالها مع زوجها، ونزلت حتى تعمل وبمساعدة حماتها استطاعت أن تربي أبنائها وتعطيهم الحياة التي يستحقونها، ولكن بعد وفاه حماتها واجهت طباع زوجها الصعبة فكان لا يعمل ويريد زوجته أن تصرف عليه وعلى بيته وفي النهاية اضطرها ان تتركه وتترك أولادها وتتوجه لمحكمة الأسرة.
عايشة مع أهله في نفس الشقة
قالت «سعاد»: أنا اتجوزت أكتر من ٢٠ سنة، خلفت من جوزي ولدين وبنت، اتجوزت صغيرة عندي 17 سنة ومكنتش افهم حاجة، مكناش قرايب كان جواز عن طريق المعارف، من ساعة ما اتجوزت وأنا عايشة في شقة فيها حماتي واخوات جوزي، ورضيت بالوضع وحمدت ربنا، وكان نفسي بس اني اعيش واربي عيالي.
أمه اللي بتصرف علينا
أكملت «سعاد»: من زمان وجوزي مبيصرفش فلوسه كلها ضايعة وأنا معرفش عنه حاجة، ولما العيال كبروا ومصاريفهم زادت اضطريت إني أنزل اشتغل، أمه اللي كانت بتصرف علينا وبالفلوس اللي بتديهالنا وفلوسي الدنيا كانت ماشية، ولما حماتي ماتت بطل يصرف خالص، ومبقاش حتى عايز ينزل يشتغل.
مبيسألش فيا بقاله 6 سنين
تابعت «سعاد»: كان بيشرب مخدرات بس قليل قلت يمكن ده اللي مضيع فلوسه، كنت بشتغل وأصرف عليه وهو قاعد في البيت، ولما قلتله حرام عليك أنت مبتصرفش مسكني وضربني علقة موت، ساعتها تعبت منه وسيبته وقررت مرجعلوش تاني، وبقالي دلوقتي اعده عند أمي من 6 سنين ومبيسألش فيا.
دعوى خلع
أنهت «سعاد» كلامها: لما مشيت خد مني العيال ورفض اني اخدهم، وبقالهم سنين معاه ومبيصرفش عليهم، أنا اللي بشتغل عند ناس وببعت لولادي الفلوس اللي محتاجينها وبصرف عليهم وبشوفهم واطمن عليهم من وراه، هو مش عايز يطلق غير لما ادفع انا فلوس الطلاق، وانا مش معايا، رافعة قضية الخلع من 3 شهور.
تابع أحدث الأخبار عبر
