أماني للقاضي: بيسرق البيت عشان المخدرات وصلت لحد إزازة الزيت
لمدة ١٧ سنة عاشت «أماني» مع زوجها ولسنين كان زوجها يتعاطى المخدرات، ولكن في اخر سنين أصبح إدمانه فوق قدرة تحمل «أماني» فأصبح أهم شئ في حياة الزوج هو حصوله على المخدرات ولا يهمه كيف دمر بيته واسرته.
تزوجت «أماني» وعاشت الزوجة في معاناة مع زوجها من بداية الزواج بعدما علمت إدمان الزوج الذي جعلها لا تريد سوى الفرار من حياتها معه، ولكنها حاولت إصلاحه ومعالجته من أجل أولادهم، فقط ليزيد الزوج في إدمانه للمخدرات وسيطرت على حياته، فأصبح يسرق زوجته التي تعمل من أجل ان تصرف على اولادهم وكان يسرق بيته فقط من أجل مزاجه، وبعد ما فاض الكيل بالزوجة توجهت لمحكمة الأسرة لترفع دعوى خلع .
المخدرات لحست دماغه
"مبقاش نافع اعيش معاه خالص" هذا ما بدأت به «أماني» قصتها وهي ترويها لموقع الحادثة واكملت حديثها قائلة: اتجوزت من ١٧ سنة وخلفت ٣ أولاد ، جوزي فضل أول ٣ سنين بس كويس ومكنش في مشاكل، لحد بعد كدة بقى يشرب مخدرات الأول كان بانجو وحشيش اتغير من بعدها بس الدنيا كانت ماشية لحد من خمس سنين بقى مدمن بودرة وايس ومن ساعتها بقى واحد تاني والحياة معاه بقت لا تحتمل.
بيسرقني عشان المخدرات
تابعت «أماني» : بقاله خمس سنين دماغه للمخدرات بس ولا بيفكر فيا ولا في عياله لحد ما بقيت انا اللي اشتغل وشايله البيت عشان اعرف اصرف على عيالي وبقيت امسح البيوت وانضفهم عشان اجيب فلوس، هو بقى بسرقني وانا جاية من الشغل وتعبانة باجي انام على طول يستغل وانا تعبانة يقول هاتي ٥٠ جنية اديله ولما انام يفتح محفظتي ويسرقني وياخد اللي فيها.
بيخنقني عشان عايز فلوس
أضافت الزوجة: بقى يسرق كل حاجة في البيت عشان يكمل ويجيب مخدرات وصل بيه انه بيسرق ازازة الزيت عشان يبيعها ويجيب مخدرات، وبقى لما يشرب يمسكني ويضربني ويبهدلني، لما كان يضيق بيه الحال ومعهوش فلوس وانا معايا وميرضاش اديه يخنقني ويضربني عشان الفلوس ، لحد ما خلى الحياة معاه لا تحتمل.
عايز يولع في انا وولاده
اكملت الزوجة كلامها وقالت: سيبته لما الموضوع زاد وبقيت مش قادرة اتحمل الحياة معاه، لما بيشرب بيبقى مش في وعيه اخدته في مرة هو مش في وعيه وديته عند اهله، ومعملش حاجة لما فاق قال هيرجع لبيته، وفي الأخر جاب بنزين عشان يولع فينا ومش راضي يطلقني عشان مش معاه فلوس يطلق قلتله هدفع انا وهو مش راضي يريحني ، فرفعت عليه قضية خلع.
