أسماء في دعوى طلاق: «قاعد لي في البيت وبياخد مصروفه مني»
تحتمي المرأة في ظل رجل ليكون سندا وعوضا لها في حياتها هي وأولاده ولكن في أحيان كثيرة تكون هي السند لعش الزوجية ويصبح الزوج عالة عليها بدلا من مساندتها ما يجعلها تدرك أن الانفصال هو الحل الأمثل لذلك رفعت أسماء دعوى طلاق على زوجها بعد تكاسله عن العمل من أول شهر في الزواج.
«من أول الجواز وهو قاعد لي في البيت».. بهذه الكلمات بدأت صباح حديثها للقاضي، مؤكدة على معاناتها من أول شهر في الزواج بسبب تكاسل الزوج عن العمل، أضافت: «كان معروف عننا إنه في المنطقة أحسن حد بتاع محارة وكل الناس بتحلف بحياته وأخلاقه، اتقدم لي واتخطبنا سنة ونص وكان كويس معايا وبيحب شغله جدًا وبشتغل ليل ونهار عشان يخلص تجهيزات الشقة»، تابعت: «من ساعة ما تجوزنا وهو قاعد في البيت وبعد أسبوعين قولت له إنت مش هتنزل الشغل قالي أنا واخد أجازة، فضلنا كدا أول شهرين ومبقاش في حاجة نأكلها في البيت".
بدأت الزوجة تبحث عن العمل لتساعد زوجها من أجل الحفاظ على عش الزوجية السعيد، تابعت: «لما لقيته كدا قاعد لي في البيت من غير شغل واحنا مش لاقيين حاجة نأكلها، نزلت اشتغل عشان أجيب لنا أكل وعشان مخربش البيت خصوصًا لما عرفت إني حامل، قلت يمكن لما يلاقيني بشتغل وهو لا يتكسف على دمه وينزل الشغل»، أضافت: «لما لقاني بشتغل وبجيب فلوس بقا يستناني ارجع من البيت عشان اديله فلوس، وكل لما أقوله مش هتنزل تشتغل يقولي ما إنتي بشتغلي أشتغل ليه».
فشلت كل محاولات الزوجة
في بداية الأمر وجدت الزوجة أعذار كثيرة للزوج بعد ما رفض النزول للعمل ولكن عندما تمادى الوضع لم تتحمل الزوجة وطلبت الطلاق للفرار من زوجها الذي لا يريد تحمل المسئولية، تابعت: «كنت بعذره في الأول وكنت بقول اشتغل كتير في الخطوبة أكيد تعبان بس عدى شهر ورا شهر لحد ما خلفت وهو برضوا على نفس الحال، خدت أجازة من الشغل عشان خلفت لقيته بيقولي شدي حيلك عشان تنزلي الشغل».
أضافت: «اليوم دا عرفت إنه عمره ما هيتغير والأحسن ليا إني اتطلق طالما كدا كدا لوحدي وهو مبيساعدنيش في أي حاجة، طلبت منه الطلاق رفض وقالي هتغير وعشان خاطري متسبنيش بس أنا خفت على ابني لما يكبر ويشوف أمه هي اللي بتصرف على أبوه هيقول إيه؟».
انهت أسماء حديثها: «سبت له البيت وروحت عند أهلي ورفعت قضية طلاق بقالي سنة ولسه ماشين في الإجراءات».
تابع أحدث الأخبار عبر
